नेपाल कम्युनिस्ट पार्टी (नेकपा) प्रचण्ड–नेपाल समूहका अध्यक्ष पुष्पकमल दाहाल ‘प्रचण्ड’ले माघ ९ गते काठमाडौंमा गरिएको प्रदर्शनको तरंग देशबाहिर पनि गएको बताएका छन् ।

गडबड गरेमा जनताले छाड्दैनन् भन्ने सन्देश गएको उनले दाबी गरे । 

पार्टी केन्द्रीय कार्यालय कोटेश्वरमा सोमवार प्रदेश २ का नेकपा कार्यकर्तालाई सम्बोधन गर्दै प्रचण्डले कूटनीतिक क्षेत्रको कुरा सुन्दा आफूहरूको आन्दोलनको तरंग ठूलै गएको बताएका हुन् ।

‘कूटनीतिक क्षेत्रको पनि कुरा सुनें, केही डिप्लोम्याटसँग भर्खरै भेटेर आएँ । उनीहरूको रियाक्सन सुन्दा ठूलै तरंग गएको छ । त्यसले सबैलाई सकारात्मक ढंगले सोच्न प्रेरित गरेको छ । गडबड गर्नु हुँदैन है, जनताले छाड्दैन् भन्ने सन्देश गएको छ,’ प्रचण्डले भने, ‘सकारात्मक निर्णय गर्नेतिर चिज बढेका बेला अबको कार्यक्रमलाई अझ भव्य गरेर, प्रतिगमनलाई परास्त गर्छौं ।’

प्रचण्डले काठमाडौंमा अब हुने कार्यक्रममा सिंगै राष्ट्रलाई उतार्ने दाबी गरे । काठमाडौंमा अस्तिको भन्दा ठूलो सभा गर्नुपर्ने अवस्था आएको उनको भनाइ थियो ।