रुपन्देहीमा देखिएको अक्सिजन अभाव कम गर्न नेपाली सेनाको विमानबाट अक्सिजन सिलिन्डर झारिएको छ।

अर्थमन्त्री विष्णु पौडेलको पहल तथा बुटवल उपमहानगरपालिकाको समन्वयमा विराटनगरबाट १२० वटा अक्सिजन सिलिन्डर ल्याइएको हो।

बुटवल धागो कारखाना प्रादेशिक अस्पताल र भीम अस्पताल भैरहवाका लागि एयरलिफ्टमार्फत् विराटनगरबाट ल्याइएका १२० सिलिन्डर प्रदान गरिने बुटवल उपमहानगरका प्रमुख शिवराज सुवेदीले जानकारी दिए।

अक्सिजन अभाव कम गर्न रुपन्देहीका प्रमुख जिल्ला अधिकारी, सुनसरीका प्रमुख जिल्ला अधिकारी, रुपन्देहीका सुरक्षा निकाय, केन्द्रीय सिसिएमसीबीच समन्वय गरिएको छ।

यसअघि पनि रुपन्देहीमा सेनाकाे विमानबाट अक्सिजनका सिलिन्डर झारिएको थियाे ।

अक्सिजन अभावबाट उपचाररत सङ्क्रमितको मृत्यु भएको समाचार पटक-पटक प्रकाशित भएपछि सरकारलाई अक्सिजन व्यवस्थापनका लागि दवाव पुगेकाे छ।

बुधवारमात्रै अक्सिजन अभावमा लुम्बिनी प्रदेशभित्र १४ जनाकाे ज्यान गएको समाचार बाहिर आएको थियाे ।