वरिष्ठ चलचित्रकर्मी कार्कीको निधन

वरिष्ठ चलचित्रकर्मी, कवि, गीतकार एवं उपन्यासकार चेतन कार्कीको निधन भएको छ ।

उनको ८३ वर्षको उमेरमा वीरेन्द्र सैनिक अस्पताल छाउनीमा आइतवार बिहान कोरोना संक्रमणका कारण निधन भएको हो। 


Advertisement

संक्रमणपछि गत आइतवार उपचारार्थ अस्पताल भर्ना गरिएकोमा बिहान निधन भएको उनका जेठा छोरा पारस कार्कीले पुष्टि गरे । 

गत वैशाख १६ मा भारतको देहरादूनबाट काठमाडौं आएका उनमा ज्वरो आएपछि अस्पताल भर्ना गरिएको थियो । परीक्षणका क्रममा उनमा कोरोना संक्रमण पुष्टि भएको थियो ।


Advertisement

स्याङ्जाको फेदीखोला गाउँपालिका वडा ३, बायँटारीमा जन्मिएका उनी विविध विषयमा ज्ञाता थिए । उनले नेपाली भाषामा सहित हिन्दू र उर्दूमा पनि कविता लेखेका छन् । उनका तिनै भाषाका कविताका कृति प्रकाशित छन् । 

आफ्ना पिता इन्डियन आर्मीका कप्तान जुद्धवीर कार्कीसँगै उनी ४ वर्षको उमेरमा भारतको देहरादून गएका थिए । त्यहाँस्थित गोर्खा मिलिट्री स्कुलमा पढ्ने मौका पाएका थिए । 

वरिष्ठ फिल्म निर्देशक कार्कीको पहिलो निर्देशित फिल्म ‘भुँमरी’ हो । उनले करिब ५० बढी फिल्ममा कथा, पटकथा, संवाद, निर्देशन, प्राविधिक सल्लाह तथा गीत लेखन गरेका छन् । 

पोखरामा हिमाली सांस्कृतिक परिवार जन्माउनमा उनको ठूलो योगदान छ । पछिल्लो समय ललितपुरको जावलाखेल बस्दै आएका स्व. कार्कीका श्रीमती, २ छोरा र ४ नातिनातिना छन् ।
 

लोकान्तर संवाददाता
लोकान्तर संवाददाता

लेखकबाट थप...

कमेन्ट गर्नुहोस्