नेपाली कांग्रेसको नेतृत्वमा रहेको विपक्षी गठबन्धनले लोकतन्त्र र संविधानको रक्षाको लागि संवैधानिक र राजनीतिक लडाइँलाई निरन्तरता दिने बताएको छ । 

बिहीवार काठमाडौंमा सम्पादकहरूसँगको अन्तक्र्रिया कार्यक्रममा विपक्षी नेताहरूले सरकारले संविधानमाथि लगातार धावा बोलेकाले आफूहरू संघर्षमा उत्रिनुपरेको बताएका हुन् । 

कांग्रेस सभापति शेरबहादुर देउवाले सरकारले असंवैधानिक रूपमा २ पटक प्रतिनिधि सभाको विघटन गरेर सरकारले लोकतन्त्र समाप्त गर्न खोजेको आरोप लगाए । देउवाले सरकारले अध्यादेशमार्फत निरंशुकता लाद्न खोजेकाले आफूहरूले आन्दोलन शुरू गरेको बताए । 

नेकपा एमालेका वरिष्ठ नेता माधवकुमार नेपालले लोकतन्त्रको रक्षाका लागि आफूहरू आन्दोलनमा उत्रिएको बताए । ‘भएको संसदलाई विघटन गरेर सम्भव नभएको चुनावमा लैजान खोज्न कदमविरुद्ध हामी संघर्षमा छौं,’ नेता नेपालले भने । 

जनता समाजवादी पार्टी (जसपा) नेपालका अध्यक्ष उपेन्द्र यादवले एउटै संसदलाई एउटै प्रधानमन्त्रीले २/२ पटक विघटन गरेकोले आफूहरू आन्दोलनमा उत्रिनुपरेको बताए । संविधान र लोकतन्त्रलाई समाप्त पारेर स्वेच्छाचारी शासन शुरू गरेकाले आफूहरू आन्दोलनमा उत्रिएको यादवले बताए ।

बहुमत सांसदको हस्ताक्षर गरेपछि पनि देउवालाई प्रधानमन्त्री नियुक्त नगर्नुले राष्ट्रपति विद्या भण्डारीको भूमिका सन्देहास्पद रहेको यादवले आरोप लगाए । 

राष्ट्रिय जनमोर्चाका महासचिव मनोज भट्टले अहिलेको प्रतिनिधिसभा विघटन फरक खालको भएको र विघटनका पछाडि विदेशी शक्तिको हात रहेको उनले दाबी गरे ।