विवेकशील साझा पार्टीले पृथ्वी जयन्ती तथा राष्ट्रिय एकता दिवसलाई ‘नेपाल दिवस’का रुपमा मनाउन माग गरेको छ । नेपालको हकमा निश्चित राष्ट्रिय दिवस नभएको भन्दै सो दिनलाई ‘नेपाल दिवस’का रुपमा मनाउन विवेकशील साझाले माग गरेको हो । 

‘संसारका अधिकांश देशहरूमा विशिष्ट महत्त्वको निश्चित दिनमा राष्ट्रिय दिवस मनाइने गर्दछ, जुन स्थायी हुन्छ, नेपालका हकमा हाम्रो निश्चित राष्ट्रिय दिवस छैन,’ विवेकशील साझाले भनेको छ, ‘पृथ्वी जयन्ती तथा राष्ट्रिय एकता दिवस नै ‘नेपाल दिवस’ का लागि सबैभन्दा उपयुक्त दिन हुन सक्छ भन्ने हाम्रो धारणा हो ।’

साथै विवेकशील साझाले राष्ट्रिय एकता दिवसका दिन सार्वजनिक बिदा दिनुपर्ने माग पनि दोहोर्‍याएको छ । अनावश्यक रूपमा अनेकौँ बिदाहरू दिएर राष्ट्रिय एकता दिवसमा दिइने सार्वजनिक बिदा कटौती गर्नु अत्यन्तै खेदजनक भएको पनि विवेकशील साझाले टिप्पणी गरेको छ । 

यस्तै नेपाली रूपैयाँमा पृथ्वीनारायण शाहको तस्वीर अंकित गर्न र हरेक सरकारी कार्यालयमा उनको तस्वीर राख्नका लागि निर्देशन दिन सरकारसँग माग गरिएको छ । 

पृथ्वी जयन्ती तथा राष्ट्रिय एकता दिवसका अवसर पारेर विवेकशील साझा पार्टीले पुस २७ गतेदेखि ‘मेची(महाकाली राष्ट्रिय एकता यात्रा’ शुरू गर्दैछ । 

उक्त यात्रा माघ १६ गते शहीद दिवसका दिन अन्त्य हुने विवेकशील साझाले जनाएको छ ।