सभामुख अग्निप्रसाद सापकोटाले नेपाली समाजलाई थप ध्रुवीकृत हुन नदिन एमसीसीलाई संसद्को कार्यसूचीमा समावेश गरेको बताएका छन् ।

प्रतिनिधि सभाको आइतवारको बैठकमा सभामुख सापकोटाले एमसीसीलाई छलफलका लागि कार्यसूचीमा समावेश गरिएको बताएका हुन् ।

'दलका शीर्ष नेताहरू, सांसदहरू, संविधानविद्, कानूनविद्, सञ्चारजगत, बुद्धिजीवी एवं लब्ध प्रतिष्ठित व्यक्ति व्यक्तित्वहरूको भावनाको समेत सम्मान गर्दै नेपाली समाजलाई थप ध्रुवीकरण हुनबाट रोक्न पनि राष्ट्रिय महत्त्वका विषयवस्तुलाई कार्यसूचीमा समावेश गरी छलफल गरिनु उपयुक्त हुन्छ भन्ने लागेका हुँदा अहम् महत्त्वका विषयहरूलाई आजको कार्यसूचीमा समावेश गरिएको छ,' सापकोटाले भने ।

केपी शर्मा ओली नेतृत्वको पूर्ववर्ती सरकार र वर्तमान प्रधानमन्त्री शेरबहादुर देउवाको तीव्र दबाबका बीच पनि सभामुखले एमसीसी टेबल गर्न अस्वीकार गर्दै आएका थिए ।

आइतवार सत्ता गठबन्धनको बैठकले एमसीसी टेबल गर्ने सहमति जुटाएपछि एमसीसी कार्यसूचीमा परेको थियो ।