पूर्वप्रधानमन्त्री एवं जसपाका नेता डा. बाबुराम भट्टराईले अमेरिकी आर्थिक सहयोग कार्यक्रम मिलेनियम च्यालेन्ज कम्प्याक्ट (एमसीसी)लाई विषाक्त बनाएर जान नसकिने ढंगले अफवाह फैलाइएको आरोप लगाएका छन् । 

एमसीसीमाथि आइतवार प्रतिनिधि सभामा भएको सैद्धान्तिक छलफलमा भाग लिँदै भट्टराईले एमसीसीको विरोध गर्ने दलहरूले जनतालाई अतिरञ्जित तरिकाले भ्रममा पारेको आरोप लगाएका हुन् । 

‘एमसीसीबारे तलसम्म यति विषाक्त प्रचार गरिएको छ कि सांसदहरू आफ्नो निर्वाचन क्षेत्रमा जान नसकिने अवस्था छ । ढिलै भए पनि साथीहरुले व्याख्यात्मक टिप्पणीमार्फत् एमसीसी पारित गर्ने कुरा गर्नुभएको छ,’ भट्टराईले भने, ‘पहिला आफैंलाई जनताको बीचमा जान नसकिने गरी वातावरण विषाक्त गर्नुभयो, अहिले पातलो लँगौटी लगाएर जनतामा लाज छोप्ने काम गर्नुभएको छ ।’

भट्टराईले माओवादी केन्द्रका अध्यक्ष पुष्पकमल दाहाल प्रचण्ड र नेकपा एसका अध्यक्ष माधव नेपालप्रति लक्षितगर्दै एमसीसीबारे जनतामा अतिरञ्जित तरिकाले भ्रममा पार्ने काम गरेको आरोप लगाए । 

आफ्नै पालामा एमसीसी अगाडि बढाउने निर्णय गर्ने पूर्वप्रधानमन्त्रीले अहिले आएर राष्ट्रघाती भन्न नमिल्ने उनले टिप्पणी गरे । आफैले गरेको सहमतिलाई राष्ट्रघात भन्ने नेताले राजनीतिबाट संन्यास लिनुपर्ने उनले बताए । 

भट्टराईले भने, ‘राजनीति भनेको सम्भावनाको खेल मात्र होइन, सत्यानाश र अप्रियता बीचको छनौट हो । देश समस्यामा जाँदैछ भने अप्रिय विषय भएपछि छनौट गर्न तयार हुनुपर्छ । एमसीसी अलिकति अप्रिय भए पनि देशको हितमा छ ।’

गठबन्धनमा रहेका दलहरूले जनतालाई हामीले एमसीसीबारे बुझेका रहेनछौं अब बुझ्यौँ भन्नुपर्ने भट्टराईले बताए । 

‘हामीले भनेको त  ठीक हो तर, सत्ता छोड्न सकेनौँ भन्ने हो भने जनता भ्रममा पर्छन् । गठबन्धनमा रहेका नेताहरुले हामीले बुझेका रहेनछौं । अब बुझ्यौँ भन्न सक्नुपर्छ’, उनले भने ।