नेपाली कांग्रेसका केन्द्रीय सदस्य डा. मीनेन्द्र रिजालले दुई वटा बाध्यात्मक कारणले गर्दा स्थानीय तहको निर्वाचनमा कांग्रेसले गठबन्धन गर्न नसक्ने बताएका छन् ।  

बुधवार ट्वीट गर्दै रिजालले कांग्रेसको विधानले महानगरबाहेक स्थानीय तहको टिकट निर्णय स्थानीय तहकै पार्टीले गर्ने भएकाले केन्द्रीय तहमा गठबन्धन बनाउने निर्णय गर्न अप्ठ्यारो भएको बताएका हुन् ।

‘महानगरबाहेक स्थानीय तहको टिकटको निर्णय स्थानीय तहमै हुने विधानको व्यवस्थाका कारणले पनि केन्द्रीय तहमै गठबन्धन बनाउने निर्णय गर्न कांग्रेसलाई अप्ठ्यारो छ,’ रिजालले भनेका छन् । 

त्यसै गरी कांग्रेस कार्यकर्ता र कांग्रेसलाई मत दिइरहेका मतदाताले रूख चिह्नबाहेक अरूमा मत नदिने भएकोले पनि केन्द्रीय तहबाटै गठबन्धनको निर्णय गर्न नसकिने रिजालले बताएका छन् । 

सधैँ रूखमा मत दिनेले अरू तिर नदिने र पहिले कहिल्यै रुखमा मत नहालेकाले अहिले पनि नहाल्ने भएकाले केन्द्रीय तहमै चुनावी गठबन्धन गर्न नसकिने उनले बताएका हुन् ।

पहिले कहिल्यै रुखमा मत नदिएको भनेर रिजालले नेकपा एकीकृत समाजवादीका नेता कार्यकर्तालाई इंगित गरेका हुन् । उनीहरू एमालेबाट विभाजन भएर आएका हुन् ।

एमाले र कांग्रेस निर्वाचनमा जहिले दुई ध्रुवका प्रतिस्पर्धी भएकाले एमालेले कांग्रेसलाई र कांग्रेसले एमालेलाई भोट हाल्ने गरी अहिलेसम्म चुनावी तालमेल भएको छैन ।

१. सधैँ रूखमा दिनेले अरू तिर र पहिले कहिले नदिएकाले पहिलो पटक अहिले रूखमा मत नदिने, र
२. महानगर बाहेक स्थानीय तहको टिकटको निर्णय स्थानीय तहमै हुने विधानको व्यवस्थाका कारणले पनि,
केन्द्रीय तहमै गठबन्धन बनाउने निर्णय गर्न काङ्ग्रेसलाई अप्ठ्यारो छ।

— Minendra Rijal (@MinendraRijal) March 16, 2022