प्रधानमन्त्री शेरबहादुर देउवाले स्थानीय तहको चुनावमा गठबन्धनलाई अझ बढी एकताबद्ध बनाएर लैजाने बताएका छन् । गठबन्धनकै कारण आफू प्रधानमन्त्री बनेको र अप्ठ्यारो आए फुकाएर अघि बढ्ने उनको भनाइ छ । 

रिपोर्टर्स क्लबको वार्षिकोत्सव कार्यक्रमलाई बिहीवार काठमाडौंमा सम्बोधन गर्दै देउवाले चुनावमा गठबन्धन गरेर जाने निर्णय पार्टीले गरिसकेको र यसमा कुनै दुई मत नभएको बताए । 

‘हाम्रो पार्टीले गठबन्धन गरेर जाने कुरा गरेको छ । गठबन्धन कुनै हालतमा टुट्दैन । अझ बढी एकताबद्ध रूपमा अगाडि बढ्छौँ । अप्ठ्यारोलाई फुकाएर अघि बढ्छौं,’ कांग्रेस सभापति समेत रहेका देउवाले भने । 

सोही कार्यक्रममा माओवादी केन्द्रका अध्यक्ष पुष्पकमल दाहाल प्रचण्डले कांग्रेसले चुनावी गठबन्धन गर्ने निर्णय गरिसकेको अवस्थामा अघि बढ्न सहज भएको बताएका थिए । गठबन्धनको बैठक बसेर निर्णय लिइने उनले बताए ।