आफ्ना मौलिक सांगीतिक सिर्जनामार्फत स्रोता दर्शकको मन जितिरहेका प्रकाश दुतराजले नयाँ गीत सार्वजनिक गरेका छन् – मन भुल्छ । 

मंगलबार राति सार्वजनिक यो उनको ‘जाम भो माईली’पछिको अफिसियल गीत हो । जुन गीत उनले ७ महिनाको अन्तरमा श्रोता/दर्शकमाझ ल्याएका हुन् । 

प्रकाश आफ्ना गीतका शब्दलहर आफै बुज्दै आएका छन्, आफै भाका हाल्दै आएका छन् । ‘मन भुल्छ’मा पनि उनकै शब्द र संगीत छ । कृष्ण बि.कले गीतको एरेन्ज गरेका छन् ।

गीतमा प्रकाशसँगै गायिका शान्तीश्री परियारले स्वर दिएकी छिन् । प्रकाश र शान्तीश्रीले स्वर दिएका ‘घर कता हो बहिनी’ र ‘जाम भो माईली’ गीत यसअघि करोड क्लबमा पुगिसकेका छन् । 

‘मन भुल्छ’को भिडियोमा भने प्रकाशले नयाँ र रचनात्मक प्रयोग छन् । त्यो के भने यसमा आफ्ना यसअघि स्रोता दर्शकले रुचाएका सिर्जनाभित्रका पात्रहरुलाई एउटै भिडियोभित्र प्रस्तुत गरेका छन् ।

प्रकाशको ‘बैनी झ्यालैमा’ गीतलाई स्रोता दर्शकले रुचाए ।

त्यसपछि सार्वजनिक गीत ‘चोली मैलै भो’ले विस्तारै चर्चा पाउँदै गएर करोड क्लबको नजिक पुग्यो । 

‘घर कता हो बैनीको’ निकै लोकप्रिय भयो । अनि ‘जाम भो माइली’ले प्रकाशलाई करोड क्लबमा ‘ह्याट्रिक’ गराइदियो ।

 हो, यीनै चारवटा ‘हिट’ सिर्जनाभित्रका पात्रहरुलाई ‘मन भुल्छ’मा एउटै भिडियोभित्र हेर्न सकिन्छ । 

भिडियोमा प्रकाश दुतराजसँगै सुजल बम, भूमिका गिरी, जुना सुन्दास, आयुष्मा कार्की, विजय पुन, रोशनी कार्कीलाई प्रस्तुत गरिएको छ ।

यीबाहेक यसअघिका चार गीतमा नरहेकी मोडल गीता ढुंगाना भिडियोमा प्रस्तुत छिन् ।

भिडियोमा उनले यसअघिका पात्रको पहिरन शैली, अभिनयलाई पनि उही रुपमा प्रस्तुत गर्ने प्रयास गरेका छन् । 

‘स्रोता दर्शकहरुले रुचाइदिनुभएको पात्रहरुलाई एकै ठाँउमा राखेर, एउटा कथा बुनेर, शब्दहरुमा लय राखेर गीत बनाएको हुँ’ प्रकाशले भने । 

भिडियोमा उनी ‘क्रियटर’को भूमिकामा प्रस्तुत छन् र उनले अघिल्ला सिर्जनाका पात्रहरुलाई कल्पना गरेका छन् । प्रकाश सांगीतिक क्षेत्रमा सम्भावना बोकेका पछिल्लो पुस्ताका सर्जक हुन् । 

मौलिक मिठासले भरिपूर्ण सिर्जनाहरु ल्याउँदै आएका उनका सिर्जनाहरुलाई स्रोता दर्शकले रुचाउँदै आएका छन् । 

मौसम हिमालीको निर्देशन रहेको ‘मन भुल्छ’को भिडियोलाई अनिल के. मानन्धनले छायाँकन गरेका हुन् ।

नबिन घर्ती मगरको सम्पादन तथा कलरपछि भिडियो सार्वजनिक गरिएको हो । अघिल्ला सिर्जनाहरुलाई जस्तै यसलाई पनि स्रोता दर्शकले रुचाउने प्रकाशले विश्वास लिएका छन् ।