राष्ट्रिय प्रजातन्त्र पार्टी (राप्रपा) नेपालका अध्यक्ष कमल थापाले धर्म परिवर्तनको डढेलोले मुलुकलाई खतरातर्फ धकेलेको दाबी गरेका छन् ।

पछिल्लो डेढ दशकमा ३० लाखभन्दा बढी नेपालीलाई धर्म परिवर्तन गराइएको भन्दै उनले यसबाट देश धार्मिक द्वन्द्वतर्फ जाने अवस्था सिर्जना हुँदै गएको बताए । 

राप्रपा नेपाल लुम्बिनी प्रदेशले बिहीवार बिहान बुटवलमा आयोजना गरेको पत्रकार सम्मेलनमा बोल्दै नेता थापाले भने, ‘धर्म परिवर्तन गर्नेमा बढी आदिवासी जनजाति र दलित समुदाय छन् । यसबाट देश धर्मकै कारण अप्ठ्यारोमा जाने अवस्था देखिन्छ । यो मुलुकका लागि ठूलो अप्ठ्यारो अवस्थातर्फ गएको संकेत हो ।’

उनले हिन्दू राष्ट्र र धर्म निरपेक्षताको विषयमा जनमत संग्रहमा जानुपर्ने बताए । बहुमत जनता अहिले पनि हिन्दू राज्यको पक्षमा रहेका भन्दै उनले यो विषयमा जनमत संग्रह गर्नुपर्ने बताए ।

राजतन्त्र पुनःस्थापनाको एजेण्डा राप्रपाले छाडे पार्टी एकता हुने बताए । अहिलेको अवस्थामा राजतन्त्र पुनःस्थापना सम्भव नभएको बताउँदै उनले राजेन्द्र लिङ्देन नेतृत्वको पार्टीले राजतन्त्रको एजेन्डा छाडे पार्टी एकता गरेर आफूले नेतृत्व समेत हस्तान्तरण गर्ने उनले बताए ।

‘असम्भव एजेन्डा बोक्दा आफैं फेल हुने भएकाले राजतन्त्र पुनःस्थापनालाई छाडेर हिन्दूराज्यको एजेन्डा बोकेका हौं । यदि यो राजतन्त्र पुनःस्थापनाको एजेण्डा लिङ्देनले छाडे म पार्टी उहाँलाई बुझाइदिन तयार छु,’ थापाले भने ।

थापाले संघीय संरचनामा प्रत्यक्ष निर्वाचित प्रधानमन्त्री हुनुपर्ने, पूर्ण समानुपातिक निर्वाचन प्रणाली र प्रत्यक्ष निर्वाचित राष्ट्रपति हुनुपर्ने राप्रपा नेपालको एजेण्डा रहेको उनले बताए ।

सरकारको गलत नीति र अकर्मण्यताका कारण देशमा तीव्रगतिले महंगी बढेको थापाले बताए । पेट्रोलियम पदार्थ, ग्यासमा सरकारले अनावश्यक कर लगाउँदा अत्यधिक मूल्यवृद्धि भएको भन्दै पेट्रोलियम पदार्थ र ग्यासमा लगाउँदै आएको कर घटाएर जनतालाई राहत दिनुपर्ने उनले बताए ।