हिल्स होम थियटर एन्ड प्रोडक्शन प्राइभेट लिमिटेडले ‘हाम्रो कला, हाम्रो संस्कृति २०७९’ कार्यक्रम सम्पन्न गरेको छ।

आइतवार साँझ नेपाल प्रज्ञा प्रतिष्ठानमा कार्यक्रम सम्पन्न भएको हो । 

सञ्चार तथा सूचना प्रविधि मन्त्री ज्ञानेन्द्रबहादुर कार्कीको प्रमुख आतिथ्यतामा सञ्चालन भएको सो कार्यक्रममा वरिष्ठ कलाकार मदनकृष्ण श्रेष्ठ, गायक मुरलीधर, गायक रामकृष्ण ढकाल, देव श्रेष्ठ, सत्य आचार्य, स्वरूप आचार्य, प्रितम आचार्य, लोकदोहोरी गायिका राधिका हमाल, गायिका एलिना चौहान, शैलेन्द्र सिम्खडा, कलाकार जोगिन्द्र (पानवाला) लगायतले प्रस्तुती दिएका थिए ।

कार्यक्रममा हिल्स होमका प्रवन्ध निर्देशकसमेत रहेका कलाकार प्रभाकर देव शर्माले आफ्नो ५० वर्षीय कलाकारिता यात्राको बारेमा तयार पारिएको नाटक प्रस्तुत गरिएको थियो ।

५ वर्षको उमेरबाट नै नेपाली कलाकारिता क्षेत्रमा लागेर गीत गायन/लेखन, नृत्य, निर्देशन, नाटक तथा विभिन्न चलचित्रमा काम गरिसकेका शर्मालाई उपस्थित कलाकारहरूले शुभकामना समेत दिएका थिए । 

कार्यक्रममा नेपालकी पहिलो नायिका भुवन चन्दलाई उनको कला जगत् प्रतिको लगाव र योगदानका आधारमा सम्मान समेत गरिएको थियो ।