सत्ता गठबन्धनमा नागरिकता विधेयकलाई अगाडि बढाउन सहमति जुटेको छ । प्रधानमन्त्री निवास बालुवाटारमा भएको सत्तारूढ दलको बैठकले नागरिकता विधेयक अगाडि बढाउने निर्णय गरेको सरकारका प्रवक्ता ज्ञानेन्द्रबहादुर कार्कीले जानकारी दिए । 

उनका अनुसार बैठकमा प्रधानमन्त्री शेरबहादुर देउवाले नागरिकता  विधेयक अगाडि बढाउने प्रस्ताव गरेका थिए। सोहीअनुसार निर्णय भएसँगै  प्रक्रिया पूरा गरेर चाँडै नै नागरिकता विधेयक संसद्मा पेश हुने कार्कीले बताए । 
 यस्तै सञ्चार तथा सूचना प्रविधिमन्त्री कार्कीले शान्ति प्रक्रियालाई चाँडै नै निष्कर्षमा पु¥याउनका लागि छलफल केन्द्रित भएको पनि बताए । 

बैठकमा कानून, न्याय तथा संसदीय मामिलामन्त्री गोविन्द कोइरालाले अहिलेसम्म भएको प्रगति विवरणबारेमा जानकारी गराएका थिए । 
    
मन्त्रिपरिषद् पुनर्गठनका विषयमा कुरा उठेन

कार्कीले बैठकमा मन्त्रिपरिषद् पुनर्गठनको कुरा नउठेको जिकिर गरे । सत्तारुढ एकीकृत समाजवादीले यसअघि नै मन्त्री फेर्ने निर्णय भएपनि हालसम्म कार्यान्वयन भएको छैन । यस्तै जसपामा पनि मन्त्री फेर्नेबारे आवाज उठेपनि निर्णय भएको छैन । यस्तो पृष्ठभूमिमा बैठकमा केही कुरा नउठेको उनको जिकिर छ । 

बैठकमा प्रधानमन्त्री देउवासहित नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’, नेकपा एकीकृत समाजवादीका अध्यक्ष माधवकुमार नेपाललगायतको उपस्थिति थियो ।