नेकपा (एकीकृत समाजवादी)का अध्यक्ष माधवकुमार नेपालले पेट्रोलियम पदार्थको मूल्य वृद्धि हटाउने विषयमा सत्तारुढ दलहरुबीच सहमति भएको बताएका छन् ।

पूर्वप्रधानमन्त्री समेत रहेका अध्यक्ष नेपालले आज बिहान बसेको प्रधानमन्त्रीसहितको सत्तारुढ पाँच दलको बैठकले पेट्रोलियम पदार्थको वृद्धि गरिएको मूल्य घटाउने विषयमा सहमति गरेको बताएका हुन् ।

शनिबार काठमाडौंमा बसेको पार्टी केन्द्रिय कमिटीको बैठकमा बोल्दै उनले पाँच दलबीच भएको सो सहमतिलाई सरकारले छिट्टै पालना गर्ने विश्वास समेत व्यक्त गरे । 

जनतालाई कष्ट पार्ने गरी सरकारले कुनै पनि वस्तुको मूल्य वृद्धि गर्न नहुने उल्लेख गर्दै अध्यक्ष नेपालले बजार अनुगमन गरेर कालाबजारी गर्नेहरुलाई पनि कारबाही गर्न सरकारलाई सचेत गराइएको बताए । 

अध्यक्ष नेपालले मुलुकलाई भ्रष्टिकरणको बाटोमा जान नदिन पनि सरकारलाई आफूहरुले दवाव दिने काम गरिरहेको बताए ।