श्रीलंकाका राष्ट्रपति र प्रधानमन्त्रीले राजीनामा दिन तयार भएको बताएका छन्  ।

शनिवार प्रदर्शनकारीहरूले राष्ट्रपति भवन तोडफोड गरेसँगै राष्ट्रपति गोटाबय राजपक्ष र प्रधानमन्त्री रानिल विक्रमासिंघेले राजीनामा दिन तयार भएको बीबीसीले उल्लेख गरेको छ । 

बीबीसीका अनुसार राष्ट्रपति राजपक्षले ३ दिनपछि अर्थात १३ जुलाइमा राजीनामा दिने घोषणा गरेका छन् । प्रधानमन्त्री विक्रमासिंघेले पनि मार्गप्रशस्त गर्न सहमत भएको उनको कार्यालयले जनाएको छ । 

विक्रमासिंघेले श्रीलंकामा सर्वदलीय सरकार गठनका लागि आफूले राजीनामा दिने बताएको बीबीसीले उल्लेख गरेको छ । 

प्रदर्शनकारीहरूले शनिवार प्रधानमन्त्री निवासमा समेत आगजनी गरेका छन् । 

राष्ट्रपति निवासमा तोडफोड भएपछि राजपक्षलाई सुरक्षित स्थानमा लगिएको बीबीसीले उल्लेख गरेको छ । 

श्रीलंकामा निम्तिएको आर्थिक संकटलाई राष्ट्रपतिले सही ढंगले सम्बोधन गर्न नसकेको भन्दै आक्रोशित भीडले राष्ट्रपति निवासमा तोडफोड गरेको बीबीसीले जनाएको छ ।

प्रदर्शनकारीहरूले राष्ट्रपति राजपक्षको राजीनामा माग गर्दै ‘गोटा गो होम’को नारा समेत लगाएका थिए ।