गत साउन २ गते अपहरणमा परेकी मोरङको बुढीगंगा गाउँपालिका –१ का दीपेन्द्र यादवको एक वर्षीया छोरीलाई प्रहरीले भारतबाट उद्धार गरेको छ । 

मोरङ प्रहरीबाट खटिएको प्रहरीले भारतको दरभङ्वाबाट उद्धार गरेर बुधवार  बिहान विराटनगर ल्याएको हो ।

बच्चालाई अपरहण गर्ने अञ्जली साहलाई प्रहरीले नियन्त्रणमा लिएको छ ।

उनले भारतको दरभङ्वामा आफन्तको घरमा बच्चालाई राखेकी थिइन् । 

प्रहरीले दरभङ्वाबाट बालिकालाई सकुशल उद्धार गरेर ल्याएको मोरङ प्रहरीका डिएसपी राजन कार्कीले जानकारी दिए ।

‘के कारण बच्चालाई अपहरण गरेको हो भन्ने खुलेको छैन, अहिले बच्चालाई र लैजानेलाई नियन्त्रणमा लिएका अनुसन्धान भइरहेको छ,’ डिएसपी कार्कीले भने, ‘थप अनुसन्धानपछि बच्चा लैजानुको कारण खुल्नेछ । अहिले हामी अनुसन्धानको क्रममा रहेका छौं ।’

साउन २ गते सोमवार अञ्जलीले रोडशेष चौकबाट प्रेमी दीपेन्द्रलाई झुक्याएर बालिकालाई लिएर फरार भएकी थिइन् । 

बच्चालाई लिएर जाने अञ्जली दीपेन्द्रको प्रेमिका रहेको खुलेको प्रहरीले जनाएको छ ।

यादवले तीन वर्षअघि  सप्तरी राजविराजकी एक युवतीसँग विवाह गरेका थिए । 

छोरी जन्मिएपछि ममता बीबीए पढ्न काठमाडौं गइन् । एक वर्ष तीन दिनकी छोरीलाई हजुरबुवासँगै छोडेर उनी काठमाडौं गएकी थिइन् । 

श्रीमती बाहिर गएको बेला यादवको सामाजिक सञ्चालमार्फत अञ्जलीसँग भेट भएको थियो । 

त्यसपछि उनीहरू नजिकिएका थिए । 

प्रेम सम्बन्धमा बाँधिएका यादव र अञ्जलीबीच निरन्तर भेटघाट हुने गरेको थियो । 

प्रहरीका अनुसार, दुबै जना प्रेममा गाँसिएपछि यादवलाई अञ्जलीले निरन्तर बोलाउने गर्थिन् । 

यादवले छोरीलाई विराटनगर १२ रोडशेष चौकमा ल्याएर खाजा खुवाउने क्रममा अञ्जलीले औषधी किन्ने बहनामा छोरीलाई लिएर सम्पर्कविहीन भएकी थिइन् । 

यादवले चिया र चुरोट खान लाग्दा अञ्जलीले यादवको एउटा मोबाइलसमेत लिएर गइन् ।

‘साथीहरूलाई फोन गर्नुपर्ने भन्दै’ मोबाइल लिएर अञ्जली गएको यादव परिवारले प्रहरीमा जानकारी गराएका थिए ।

सोही फोनका आधारमा प्रहरीले बालिकाको उद्धार र आरोपीलाई नियन्त्रणमा लिएको प्रहरीले जनाएको छ ।