नेकपा (एमाले)का अध्यक्ष केपी शर्मा ओलीले विदेशी शक्तिले एमालेलाई कमजोर बनाउन सत्तारूढ गठबन्धन बनाएको आरोप लगाएका छन् । 

शनिवार ललितपुरको गोदावरीस्थित सनराइज हलमा शुरू भएको नेपाल ट्रेड युनियन महासंघ (जिफन्ट)को आठौं राष्ट्रिय महाधिवेशन उद्घाटन गरेपछि मन्तव्य राख्दै नेपाली राजनीतिका देशी÷विदेशी शक्ति हावी भएको दाबी गरेका हुन् ।

नेपालमा मजदुर वर्गपक्षीय शक्तिलाई कमजोर पार्ने प्रयास भइरहेको र त्यसकै लागि एमालेलाई विदेशी शक्ति समेत लागेर विभाजन गरेको उनको दाबी थियो ।

‘मजदुर वर्गपक्षीय विचारका संवाहक शक्ति, ती हितका संवाहक शक्ति, तिनीहरूलाई प्रतिक्रियावादी शक्तिहरूले राष्ट्रिय र अन्तर्राष्ट्रियस्तरमै विभाजित गर्न खोज्दछन् । आज हाम्रो देशमा तथाकथित जुन गठबन्धन भन्ने देखापर्‍यो । यो गठबन्धन के हो ? यो गठबन्धन, यस्ता गठबन्धन, हाम्रो पार्टी जसरी गत वर्ष विभाजन गराइयो, गरियो’, ओलीले भने । 

आफ्नो नेतृत्वको सरकारले ‘समृद्ध नेपालः सुःखी नेपाली’को राष्ट्रिय गन्तव्य तय गरेको त्यसलाई अवरूद्ध गर्न देशी÷विदेशी शक्ति लागेको उनले बताएका थिए । 

‘मजदुर वर्गपक्षीय विचारहरू, मजदुर वर्ग पक्षीय हितहरू, मजदुर पक्षीय संगठनहरू, संस्थाहरू, मजदुर वर्ग पक्षीय आन्दोलनहरू, तीनलाई कमजोर पार्ने प्रयासहरू । किनभने अन्तिममा समृद्ध नेपालः सुःखी नेपालीको गन्तव्य कसको हो त ?’, सम्मेलनमा ओलीले प्रश्न गरेका थिए ।