प्रतिनिधि सभा सदस्य डा. डिला संग्रौला पन्तले नर्सिङ कलेज सञ्चालन गर्ने शिक्षण संस्थाको आफ्नै १०० शय्याको अस्पताल हुनुपर्ने प्रावधान अव्यवहारिक भएको बताएकी छन् । शुक्रवार प्रतिनिधि सभाको बैठकको शून्य समयमा बोल्दै उक्त प्रावधान संशोधन गर्न माग गरेकी हुन् । 

नेपालमै दक्ष जनशक्तिको अभाव रहेको बेला नेपालले नर्सहरूलाई बेलायत पठाउन स्वीकृति दिएकोमा समेत आपत्ति जनाइन् । उनले नर्सिङ विषय पठनपाठन गर्ने धेरै कलेजहरू चिकित्सा शिक्षा ऐन २०७५ र  नियमावली २०७७ ले तोकेको मापदण्ड पूरा गर्न नसकेका कारण बन्द भएको उनको भनाइ छ । 

‘प्राविधिक एसएलसी, डिप्लोमा तथा स्नातक तहमा निशुल्क छात्रवृत्तिमा पढ्न योग्य सयौँ विद्यार्थीहरू पढाइबाट बन्चित हुनुपरेको छ र अर्बौं रुपैयाँको लगानी डुब्ने स्थिति पैदा भएको छ’, उनले भनिन्, ‘गुणस्तरीय नर्सिङ शिक्षामा सम्झौता नहुने गरी नेपालका कलेजहरूलाई नर्सिङ पठनपाठन अगाडि बढाउन सहजीकरण गर्न साथै कर्णाली र सुदूरपश्चिम प्रदेशमा पिसिएल नर्सिङ कार्यक्रम सञ्चालन गर्ने तत्काल व्यवस्था मिलाउन म माग गर्दछु ।’