एमाले निकट विद्यार्थी संगठन अनेरास्ववियुले नेपाल आयल निगमबाट स्वचालित मूल्य प्रणालीको अवज्ञा भएको आरोप लगाएको छ । अनेरास्ववियुका कार्यबाहक अध्यक्ष आरसी लामिछानेले मूल्य समायोजन नगरी निगमले उल्टै धम्कीसहितको विज्ञप्ति जारी गरेको भन्दै आक्रोश पोखेका छन् ।  

उनले स्वचालित मूल्य प्रणाली कायम गराउन संगठन जस्तोसुकै मूल्य चुकाउन  पनि तयार रहेको बताए । ‘स्वचालित मूल्य प्रणालीको अवज्ञा गर्दै, मुल्य समायोजन नगर्ने धम्कीसहित  आयल निगमद्वारा जारी  विज्ञप्ति खेद व्यक्त गर्दछौँ,  स्वचालित मूल्य प्रणाली कायम गराउन हामी जस्तोसुकै मुल्य चुकाउन तयार छौँ’, उनले भने । 

 निगमले पेट्रोलियम पदार्थको खरिद मूल्यमा गिरावट आएको भए पनि ऋण तिर्नुपर्ने दायित्व बाँकी रहेकाले मूल्य समायोजन नहुने बुधबार विज्ञप्तिमार्फत जनाएको थियो । आईओसीबाट सोमवार प्राप्त नयाँ खरिद मूल्यअनुसार पेट्रोलमा प्रतिलिटर २ रुपैयाँ ७८ पैसा नाफा तथा डिजेलमा प्रतिलिटर ९ रुपैयाँ ३७ पैसा र खाना पकाउने एलपी ग्यासमा प्रतिसिलिण्डर ४९९ रुपैयाँ ५७ पैसा घाटा रहेको निगमका सहप्रवक्ता पुस्कर कार्कीले जानकारी दिए । निगमलाई मट्टितेल र हवाई इन्धनमा भने यसअघि नै नाफा रहेको छ ।