प्रतिनिधि सभाकी उपसभामुख पुष्पा भुसाल गौतमले निलम्वित प्रधानन्यायाधीश चोलेन्द्रसमशेर जबराविरुद्धको महाअिभयोग प्रस्तावबारे संसद्को यही अधिवेशनमा छलफल हुने बताएकी छन् । 

उनले महाअभियोगको विषय संसद्मा विशेष छलफल गरेर अघि बढ्ने जानकारी दिएकी हुन् । उपसभामुख भुसालले प्रतिनिधि सभाको आगामी बैठकमा महाअभियोगको कार्यसूची राख्ने र संसदमा छलफल गरी महाअभियोग समितिमा पठाउने बताइन् । संसद्बाट प्राप्त सुझावका आधारमा निलम्बित प्रधानन्यायाधीश जबराविरुद्धको महाअभियोग अघि बढाउन आवश्यक रहेको बताउँदै उनले जबराविरुद्धको महाअभियोग बारे छानबिन गर्न समिति गठन भइसकेको जानकारी दिइन् ।

उपसभामुख भुसालले समितिले आफ्नो काम शुरू गर्नुपूर्व नै संसद्मा यसमाथि छलफल गर्न आवश्यक रहेको धारणा राखिन् । उनले समितिबाट जति चाँडो संसदमा आउँछ त्यति नै छिटो महाअभियोगको विषय टुंगो लाग्ने बताइन् ।

उपसभामुख गौतमले आगामी निर्वाचनको लागि मनोनयन दर्ता गर्ने दिनसम्म संसदको आयु रहने धारणा राखेकी छन् । संविधानले सभामुख र उपसभामुखको मात्रै म्यादको कुरा गरेको तर्क गर्दै सभामुख र उपसभामुख संसदबाटै उत्पत्तिको हुने भएकोले सोहीअनुसार नै संसदको आयु रहने बताइन् । उनले आगामी निर्वाचनको मनोनयन दर्ताको दिनसम्म मात्रै संसदको अवधि रहने भन्दै सबै सांसद र संसदको लागि यसले आगामी दिनमा नजिर बसाल्ने बताइन् ।

‘मनोनयनको दिन सबै सांसदहरूको पनि अवधि सकिन्छ । सभामुख र उपसभामुखको लागि संविधानले गरेको कल्पना नै सबै सांसदका लागि हो । यो नयाँ व्याख्या पनि हो’, उनले भनिन्, ‘सबै सांसद र संसदको लागि यो भयो भने भोलिको लागि यो नजिर बन्नसक्छ । तर सबैलाई एउटै किसिमको नियम हुनुपर्छ भन्ने छलफल अघि बढेको छ ।’

उपसभामुख भुसालले सबै सांसद र संसदको लागि एकै किसिमको नियम हुनुपर्ने कुरामा छलफल र बहस भइरहेको बताइन् ।