निर्देशक झरना थापाले आफ्नो नयाँ चलचित्र नयाँ वर्षमा प्रदर्शनमा ल्याउने भएकी छन् । गत वैशाखमा ‘ए मेरो हजुर ४’ प्रदर्शनमा ल्याएकी झरनाले आउँदो वैशाखमा ‘भागवत् गीता’ रिलिज गर्ने भएकी हुन् । 

सुहाना इन्टरटेन्मेन्टको प्रस्तुतिमा सुनिलकुमार थापा प्रोडक्सनबाट बन्ने ‘भागवत्् गीता’को शुक्रवार निर्माणसँगै प्रदर्शन मिति घोषणा गरिएको हो । श्रीकृष्ण जन्माष्टमीको अवसर पारेर युट्युबमा एक भिडियो सार्वजनिक गर्दै चलचित्रको निर्माण र प्रदर्शन मिति घोषणा गरिएको हो । 

सार्वजनिक भिडियोमा अभिनेत्री सुहाना थापा प्रस्तुत छिन् । जनकपुरधामको जानकी मन्दिरमा उक्त भिडियो खिचिएको छ । दृश्यमा अभिनेत्री सुहाना रामजानकी भक्तको रूपमा देखिएकी छन् । भिडियोमा उनी मन्दिरभित्रबाट उत्साहित भएर दौडिँदै बाहिर निस्किएको छिन् भने बाहिर निस्किएपछि उनी एकाएक भावुक हुँदै आँसु झारेको दृश्य समावेश छ । 

२०८० सालको वैशाख १ गतेका लागि प्रदर्शन मिति घोषणा गरिएको चलचित्रमा अभिनेता को हुने भन्नेबारे भने केही जानकारी दिइएको छैन । चलचित्र जनकपुर र जानकी मन्दिरको परिवेशमा छायाँकन हुने सार्वजनिक भिडियोबाट आँकलन गर्न सकिन्छ । 

चलचित्रको सहनिर्माता र अमेरिका वितरकको रूपमा नमस्ते इन्टरटेन्मेन्टका अमृत राई, जंग राई र खेम गुरुङ छन् । सञ्जय लामाको छायांकन रहने भिडियोलाई साहिल खानले सम्पादन गर्नेछन् । झरना र सुहाना दुवै कृष्णभक्त हुन् । सोहीकारण पनि कृष्ण जन्माष्टमीमा चलचित्र निर्माणको औपचारिक घोषणा भएको हो ।