नेकपा माओवादी केन्द्रले भदौ ८ गतेदेखि प्रदेशस्तरमा कार्यकर्ता प्रशिक्षण कार्यक्रम गर्ने भएको छ । शनिवार मात्र पदाधिकारी चयन गरेको माओवादी केन्द्रले आसन्न चुनावलाई लक्षित गरी भदौ ८ गतेदेखि प्रदेशस्तरीय कार्यक्रम गर्ने कार्यतालिका तयार गरेको हो । 

शनिवार बसेको माओवादीको स्थायी समितिको बैठकले भदौ ८ गतेदेखि मधेश प्रदेशबाट प्रदेशस्तरको बैठक र प्रशिक्षण कार्यक्रम शुरू गर्ने निर्णय गरेको उपाध्यक्ष कृष्णबहादुर महराले जानकारी दिए । बैठकपछि पत्रकारहरूसँग कुरा गर्दे उनले बैठक तथा प्रशिक्षण कार्यतालिका सार्वजनिक गरेका हुन् । 

उपाध्यक्ष महराका अनुसार भदौ ९ मा गण्डकी प्रदेश, १० गते प्रदेश १, ११ गते लुम्बिनी प्रदेश, १२ गते बागमती, १३ गते विशेष प्रदेश समिति, १५ गते सम्पर्क समन्वय समिति, १६ गते कर्णाली प्रदेश र १७ गते सुदूरपश्चिम प्रदेशको प्रशिक्षण कार्यक्रम हुने छ । 

माओवादी केन्द्रले सत्तारुढ गठबन्धनले सिट बाँडफाँटमा मोटामोटी सहमति जुटाएपछि मात्र प्रशिक्षण कार्यक्रम सञ्चालन गर्ने तय गरेको थियो । भदौ ७ गते गठबन्धनको बैठक भएकाले त्यसपछि प्रशिक्षण तय गरेको उपाध्यक्ष महराले बताए । 

अखिल क्रान्तिकारीको विवाद प्रचण्डले मिलाउने 

माओवादी केन्द्रले विद्यार्थी संगठन अखिल क्रान्तिकारीको विवाद समाधान गर्ने जिम्मा अध्यक्ष पुष्पकमल दाहाल प्रचण्डलाई दिएको छ । पार्टीको स्थायी समिति बैठकले विद्यार्थी संगठनमा देखिएको विवाद मिलाउने जिम्मा प्रचण्डलाई दिने निर्णय गरेको उपाध्यक्ष महराले जानकारी दिए ।

अखिल क्रान्तिकारीको अधिवेशनबाट अध्यक्षमा पञ्चा सिंह चयन भएकी थिइन् । तर उक्त कमिटीका उपाध्यक्ष रहेका पवन कार्कीले छुट्टै समानान्तर समिति गठन गरेपछि विवाद देखिएको थियो ।