नेकपा माओवादी केन्द्रका अध्यक्ष पुष्पकमल दाहाल प्रचण्डले राष्ट्रपति विद्यादेवी सेनाका प्रमुख भेट्नु अस्वाभाविक भएको बताएका छन् । शुक्रवार विराटनगर विमानस्थलमा सञ्चारकर्मीहरूसँग कुराकानी गर्दै प्रचण्डले राष्ट्रपतिले सेनाका प्रमुखलाई भेट्नु अस्वाभाविक भएको बताएका हुन् । 

सन्देशसहित फिर्ता भएको नेपाल नागरिकता (पहिलो संशोधन) विधेयक–२०७९ जस्ताको त्यस्तै पास गरेपछि राष्ट्रपति भण्डारी र सेनाका प्रमुखबीच भेटघाट भएको थियो । नागरिकता विधेयक राष्ट्रियसभाबाट चाडै पारित हुनेसमेत प्रचण्डले बताए । राष्ट्रसभाले पारित गरेपछि राष्ट्रपतिले अब प्रमाणीकरण गर्नेमा आफू विश्वस्त रहेको उनको भनाइ थियो । 

संसदका दुवै सदनबाट पास भएपछि नेपाल नागरिकता ऐन २०६३ लाई संशोधन गर्न बनेको विधेयक साउन १५ मा सभामुख अग्निप्रसाद सापकोटाले राष्ट्रपतिकहाँ प्रमाणीकरणका लागि पठाएका थिए । राष्ट्रपतिले नागरिकता विधेयक संसद्मै फिर्ता पठाएपछि राष्ट्रपति र सत्तारुढ दल बीच सबन्ध चिसिएको छ ।

यस्तै प्रचण्डले गठबन्धनले भदौ १५ गते भित्र उम्मेदवारको भागबन्डा गरी टुंगो लगाइसक्ने दाबी गरेका छन् । ‘अहिले हामी गृहकार्यमा छौँ’, उनले भने, ‘अब चाँडै नै सहमतिका आधारमा भागबन्डा गरी सक्छौँ ।’ ‘तपाईंहरूले मागेको ६० सिट नै पाउनु हुन्छ ?’ भन्ने पत्रकारको प्रश्नमा अध्यक्ष प्रचण्डले अहिले यो विषमा नबोल्ने मात्रै प्रतिकृया दिएका थिए ।