आज हरितालिका तीज । हिन्दू नेपाली महिलाहरूले महादेवको पूजा गरेर हर्षोल्लासका साथ तीज मनाएका छन् । तीजका दिन महिलाहरू व्रत बस्ने, नाच्ने, गाउने गर्छन् । नेपाली चलचित्र एवं सांगीतिक क्षेत्रका सेलिब्रेटीहरूले पनि हर्षोल्लासका साथ हरितालिका तीज मनाएका छन् । थुप्रै सेलिब्रेटीहरूले रातो सारीमा सजिएको फोटो फेसबुकमा शेयर गरेका छन् । 

गायिका इन्दिरा जोशीले विवाहपछिको पहिलो तीज मनाएकी छन् । उनले श्रीमानको लागि पहिलोपटक निर्जला व्रत बसेको उल्लेख गर्दै केही तस्वीरहरू फेसबुकमा शेयर गरेकी छन् । रातो सारीमा सजिएका तस्वीरसहित उनले तीजको शुभकामनासमेत दिएकी छन् । 

यस्तै, अभिनेत्री केकी अधिकारीले पनि विवाहपछिको पहिलो तीज मनाएकी छन् । नयाँ चलचित्र ‘झिंगेदाउ’को प्रचारप्रसारमा समेत व्यस्त रहेकी केकीले रातो सारी लगाएको तस्वीर फेसबुकमा शेयर गर्दै तीजको शुभकामना दिएकी छन् । 

अभिनेत्री प्रियंका कार्कीले पनि तीज मनाएकी छन् । रातो कुर्ता लगाएर मन्दिर अगाडिको तस्वीर सामाजिक सञ्जालमा शेयर गर्दै प्रियंकाले पनि तीजको शुभकामना दिएकी छन् । अर्की अभिनेत्री वर्षा शिवाकोटीले पनि रातो सारी लगाएको ३ तस्वीरहरू सामाजिक सञ्जालमा राख्दै तीजको शुभकामना दिएकी छन् । शुभकामना दिँदै उनले लेखेकी छन्, ‘तीज महिला शसक्तिकरणको चाडको रूपमा रूपान्तरित हुँदै जाओस् न कि कसैको दीर्घायुको निम्ति मात्र सीमित होस् ।’ 

अभिनेत्री एवं निर्देशक दीपाश्री निरौला, अभिनेत्रीहरू करिश्मा मानन्धर, दीपिका प्रसाइँलगायतले पनि हर्षोल्लासका साथ तीज मनाएका छन् । पछिल्लो पुस्ताका गायिकाद्वय एलिना चौहान र रचना रिमालले पनि तीजको शुभकामना दिँदै रातो रंगमा खिचिएका तस्वीरहरू सामाजिक सञ्जालमा शेयर गरेका छन् । चलेका गायिकाहरू भने यतिबेला तीज विशेष सांगीतिक कार्यक्रममै व्यस्त छन् ।