शुक्रवारदेखि प्रदर्शनमा आएको फिल्म ‘झिंगेदाउ’को दर्शक प्रतिक्रिया बुझ्न अभिनेत्री आँचल शर्मा सोमवार चितवन पुगेकी छन् । गृहजिल्ला चितवन पुग्दा आँचल फिल्म हल अगाडि दर्शकहरूबाट घेरिएकी थिइन् । त्यहाँ उनले फ्यानहरूबाट उल्लेख्य साथ पाइन् । 

युएफएक्सको जलमा र इन्द्रदेव हल पुग्दा आँचलसँग फोटो खिच्ने दर्शकको उल्लेख्य भीड देखिएको थियो । सोमवार यी दुवै हलमा ‘झिँगेदाउ’ ८० प्रतिशत माथिको अकुपेन्सीका साथ प्रदर्शन भएको निर्माण टिमले जानकारी दिएको छ । 

फिल्म हेर्न विशेषगरी महिलाको उपस्थिति बढी थियो । परिवारसहित फिल्म हेर्न आउनेहरूको संख्या पनि उल्लेख्य रहेको निर्माण टिमको भनाइ छ । ज्ञानेन्द्र देउजा निर्देशित ‘झिँगेदाउ’मा आँचलसँगै केकी अधिकारी, मुकुन भुषाल, कुशल विष्ट, हिउँवाला गौतम, संगम भण्डारी, विजय देउजा लगायतको मुख्य भूमिका छ । 

प्रदर्शनको पहिलो दिन दर्शकको उपस्थिति न्यून रहेको फिल्म हेर्न शनिवारदेखि दर्शकको उपस्थिति बढ्दो छ । सोमवार राजधानीका हलमा पनि दर्शकको उत्साहजनक उपस्थितिका साथ फिल्म प्रदर्शन भएको निर्देशक देउजाले जानकारी दिए । 

‘वर्ड अफ माउथ’ बलियो रहेका कारण वीकडेजमा दर्शकको उपस्थिति उत्साहजनक देखिएको छ । साहित्यकार भीमनिधि तिवारीको कथा कृतिमा आधारित ‘झिँगेदाउ’ले आमा र छोरा–बुहारीहरुको कथा पेश गर्छ ।