सञ्चार तथा सूचना प्रविधिमन्त्री ज्ञानेन्द्रबहादुर कार्कीले सरकारको सम्पूर्ण ध्यान मुलुकको आर्थिक विकास र समून्नतिमा केन्द्रित हुने बताएका छन् । निर्वाचित जनप्रतिनिधिहरूको एक कार्यकालले मुलुकमा राजनीतिक जग बसेको उल्लेख गर्दै उनले आसन्न निर्वाचनपछि मुलुकको ध्यान सम्पूर्ण रूपमा आर्थिक विकास र समुन्नतिमा केन्द्रित हुने बताएका हुन् । 

नेपाल उद्योग परिसंघले काठमाडौंमा आयोजना गरेको नेपाल पूर्वाधार सम्मेलन–२०२२ को समापन समारोहमा बोल्दै मन्त्री कार्कीले देश विकासको साझा लक्ष्यमा सरकारसँगै हातेमालो गरेर अघि बढ्न निजी क्षेत्रलाई पनि आह्वान गरे । निजी क्षेत्र र सरकारको साझा प्रयासमा मात्रै मुलुकलाई अघि बढाउन सकिने उनको भनाइ थियो । 

‘अहिले नेपाल निर्वाचनको संघारमा छ ।  नेपालको संविधान २०७२ को कार्यान्वयनमा आएपछि यो ७ वर्षको अवधिमा राजनीतिक क्षेत्रमा निकै काम भए । संघ, प्रदेश र स्थानीय तहका संरचना तयार भए । तीन वटै तहका जनप्रतिनिधिहरुको आफ्नो एक कार्यकाल पूरा गरिसकेका छन् । यसबाट राजनीतिक रूपमा जग बसेको छ’, मन्त्री कार्कीले भने, ‘अब हामीले यसमा धेरै चिन्ता गर्नुपर्ने अवस्था छैन । आसन्न निर्वाचनपछि हाम्रो सम्पूर्ण ध्यान आर्थिक विकास र समुन्नतिमा केन्द्रित हुनेछ । सरकार र निजी क्षेत्रको  आपसी सहयोग, समन्वय अनि प्रतिवद्धता यसका लागि चाहिन्छ । आउनुहोस् हामी हातेमालो गरी देश विकासको साझा लक्ष्यमा अगाडि बढौँ ।’

मन्त्री कार्कीले स्वदेशी तथा विदेशी लगानी भित्र्याई मुलुकको पूर्वाधार विकास गर्न नीतिगत, कानुनी र प्रक्रियागत सुधार गर्न सरकार तत्पर रहेको पनि बताए । पूर्वाधार विकास र उत्पादन वृद्धिमा निजी क्षेत्रको महत्वपूर्ण भूमिकालाई सहजीकरण र उत्प्रेरित गर्न सरकार आफ्ना उपकरणहरूको दक्षतापूर्ण उपयोग गर्न तयार रहेको उल्लेख गर्दै उनले गुणस्तरीय पूर्वाधार निर्माणमा ध्यान दिन निजी क्षेत्रलाई आग्रह गरे ।