प्रदेश १ का ४ सय ३८ वटा मतदान स्थल अति संवेदनशील रहेको सुरक्षा निकायले विश्लेषण गरेको छ । 

स्थानीय तहकोभन्दा संघ र प्रदेशको निर्वाचनमा प्रदेशमा ९० वटा मतदान स्थल थप गरिएको प्रहरीले जनाएको छ । 

९० वटा मतदानस्थल थपिँदा स्थानीय तहको निर्वाचनमा भन्दा संघ र प्रदेशको निर्वाचनमा १ सय १७ वटा मतदान स्थल थप संवेदनशील रहेको प्रहरीको विश्लेषण छ । 

१४ जिल्ला रहेको प्रदेशमा ४ हजार ९९ मतदान केन्द्र र १ हजार ८ सय ९७ मतदान स्थल रहेका छन् । 

ती मध्ये ४ सय ३८ मतदान स्थल अति संवेदनशील वर्गीकरण गरिएको १ नम्बर प्रदेश प्रहरी कार्यालय विराटनगरका प्रवक्ता एसपी नविनराज राईले जानकारी दिए । 

प्रदेशमा ८ सय २४ मतदान स्थल संवेदनशील र ६ सय ३५ मतदानस्थल सामान्य रहेको प्रदेश प्रहरीले जनाएको छ ।

स्थानीय तहको निर्वाचनमा प्रदेशमा ४ हजार ५१ वटा मतदान केन्द्र र १ हजार ८ सय ७७ मतदान स्थल रहँदा ३ सय २१ मतदान केन्द्र अति संवेदनशीलमा  वर्गीकरण गरिएको थियो ।

जिल्ला सुरक्षा समितिको सिफारिसको आधारमा निर्वाचन आयोगले मतदान स्थललाई ३ तहमा वर्गीकरण गरेको छ । 

तराइमा भारतसँग सीमा जोडिएका जिल्लाका केही मतदान स्थललाई प्रहरीले अति संवेदनशील भनेर विश्लेषण गरेको छ ।

प्रदेशको सबैभन्दा बढी झापामा मतदान स्थल अति संवेदनशील रहेको प्रहरीको जनाएको छ । 

झापा पछि मोरङ र सुनसरीको मतदान स्थल सुरक्षा निकायले अति संवेदनशील विश्लेषण गरि सोही अनुसार सुरक्षा रणनीति अपनाएको जनाएको छ । 

यी तीनवटै जिल्ला भारतसँग सीमा जोडिएका जिल्ला हुन् ।  

७६६ मतदान केन्द्र र २ सय ८५ मतदान स्थल रहेको झापामा ९५ मतदान स्थल अति संवेदनशील सूचीमा राखेको छ । 

यस्तै १४४ संवेदनशील र ४६ सामान्य रहेको छ ।

काठमाडौं पछि सबैभन्दा बढी निर्वाचन क्षेत्र र स्थानीय तह रहेको मोरङमा ५० वटा मतदानस्थल अति संवेदनशील छन् ।

८ सय ३९ वटा मतदान केन्द्र र ३ सय ६ वटा मतदान स्थल रहेको मोरङमा संवेदनशील १ सय ४४ र ११२ वटा सामान्य रहेका छन् ।  

मोरङको अति संवेदनशील सूचीमा राखेको मतदान स्थलमध्ये विराटनगरको दक्षिण भेगमा पर्ने ९ वटा मतदान स्थल अति संवेदनशीलमा सुरक्षा निकायले राखेको छ । 

रंगेली, धनपालथान, रतुवामाई, सुनवर्षी र केराबारी क्षेत्रको मतदान स्थललाई पनि सुरक्षा निकायले अति संवेदनशील क्षेत्रको पहिचान गरी सुरक्षा योजना अगाडि बढाएको छ । 

५ सय ९१ मतदान केन्द्र र १ सय ६६ मतदान स्थल रहेको सुनसरीमा ५९ अति संवेदनशील, ६५ संवेदनशील र ४२ सामान्य रहेको प्रहरीले जनाएको छ ।

यस्तै धनकुटा १६, उदयपुर २१, इलाम ३६, पाँचथर ३४, भोजपुर ३३, खोटाङ ४०, ओखलढुंगा १३, सोलुखुम्बु ११, संखुवासभा ७ र ताप्लेजुङ २३ मतदानस्थल अति संवेदनशील रहेको छ । 

प्रदेश १ मा संघ र प्रदेशकोे निर्वाचनमा १४ हजारभन्दा  बढी नेपाल प्रहरी खटाइने प्रदेश प्रहरी कार्यालयले जनाएको छ । 

प्रहरी बाहेक २० हजार म्यादी प्रहरी प्रहरी परिचालन गरिने भएको छ । 

नेपाल प्रहरी, म्यादी प्रहरी बाहेक सशस्त्र प्रहरी  पनि परिचालन हुनेछ । 

सामान्य मतदान स्थलमा ३ प्रहरी र ५ म्यादी, संवेदनशील मतदान स्थलमा ३ प्रहरी र ६ म्यादी परिचालन गर्ने निर्णय गरिएको छ ।

यस बाहेक मोबाइल, प्रोटेल, रिजर्भ टिम, क्यूआरटी टिम पनि प्रहरीले परिचालन गर्नेछ  । निर्वाचनमा प्रहरीले ड्रोनको प्रयोग गरेर खबर सङ्कलन तथा निगरानी गर्नेछ । 

मतगणना स्थल सुरक्षा र इजाजत पत्र प्राप्त निजी हतियार निर्वाचन अवधिभर नजिकको प्रहरी कार्यालयमा सुरक्षित राख्ने जिम्मा प्रहरीलाई दिइएको छ ।

संघ र प्रदेशको निर्वाचनमा प्रदेश १ मा कुनै पनि समूहबाट निर्वाचनमा  थ्रेट नभएको १ नम्बर प्रदेश प्रहरी कार्यालय विराटनगरका प्रमुख डिआइजी सुदिप गिरीले बताए ।

निर्वाचनमा संगठित समूहकोभन्दा भौगोलिक विकटता, खुला सिमाना र बढी जनघनत्व भएका स्थान सुरक्षा चुनौति हुन सक्ने उनले बताए ।