हिमालपारिको जिल्ला मुस्ताङको मुक्तिनाथ क्षेत्रमा आन्तरिक तथा वाह्य पर्यटकको आगमनमा वृद्धि भएको छ । 

मुस्ताङको मुक्तिनाथमा घुमघामको सिजन बढेसँगै मुक्तिनाथ मन्दिरमा दर्शन गर्न जाने धार्मिक पर्यटक तथा ट्रेकिङ गर्ने पर्यटकमा वृद्धि भएको मुक्तिनाथ विकास समितिले जनाएको छ ।

पर्यटक बढेपछि मुक्तिनाथ क्षेत्रका होटलहरू भरिभराउ छन् । वर्षको दुई सिजन मात्रै व्यापार गर्न पाउने मुक्तिनाथ क्षेत्रका होटल तथा अन्य व्यवसायीहरुमा सिजनको समयमा पर्यटक वृद्धिहुँदा उत्साहित भएका छन् । 

मुक्तिनाथ क्षेत्रमा भारतीय पर्यटकको संख्या बढेको व्यवसायीहरुले बताएका छन् । सामान्यतया अवस्थाको तुलनामा दशैँ तिहारपछि मुस्ताङका होटलहरूको अकुपेन्सी दर ८० प्रतिशत भन्दामाथि पुगेको मुक्तिनाथ क्षेत्रका होटल व्यवसायीहरूले बताए । 

इरिक इन होटलका सञ्चालक सुजन तुलाचनले तिहारपछि मुक्तिनाथ दर्शन गर्न जाने आन्तरिक, भारतीय र अन्य विदेशी पर्यटनहरूले मुस्ताङ मुक्तिनाथ क्षेत्रका होटलहरु भरिएको बताए । 

नेपाली र भारतीय पर्यटकले होटलहरू फुल अकुपेन्सीमा चलेको तुलाचनले बताए । दुई वर्ष कोभिडको मार र यो वर्ष दशैँपछि अविरल वर्षाको कारण बाटोको समस्या भएपछि मुक्तिनाथ क्षेत्रमा पर्यटकको संख्या घटेको थियो ।