अख्तियार दुरुपयोग अनुसन्धान आयोगले अदालतको निर्णयको सम्मान गर्दै न्यायिक स्वतन्त्रताप्रति पूर्ण प्रतिबद्ध रहेको स्पष्ट पारेको छ ।  अदालतको गरिमाप्रति अनास्था फैलाउने विषय कल्पनासम्म पनि गर्न नसकिने आयोगको भनाइ छ । 
बिहीबार आयोगका प्रवक्ता श्याम प्रसाद भण्डारीले जारी गरेको विज्ञप्तिमा स्वतन्त्र न्यायपालिकाको अवधारणाप्रति अख्तियार सदाझैँ अविचलित रहने भन्दै  कात्तिक २२ मा जारी गरिएको प्रेस विज्ञप्ति र जानकारीमूलक विवरणलाई अन्यथा रुपमा नबुझिदिन सम्बन्धित सबैमा आग्रह गरिएको छ ।

‘चालू आर्थिक वर्षमा हालसम्म सम्मानित सर्वोच्च अदालतमा पुनरावेदन गरिएका मुद्दाहरुको बारेमा पुनरावेदन गर्दा लिइएका आधारहरुको सम्बन्धमा आयोगबाट मिति २०७९।०७।२२ मा जारी गरिएको प्रेस विज्ञप्ति र जानकारीमूलक विवरणका सम्बन्धमा आयोगबाट असल मनसायका साथ गरिएको कार्यलाई सो विपरीत सार्वजनिक निकायहरुबीच भ्रम सिर्जना र द्वन्द्व निम्त्याउने प्रकृतिबाट भएको सम्प्रेषणतर्फ आयोगको गम्भीर ध्यानाकर्षण भएको छ’, विज्ञप्तिमा भनिएको छ । 

अख्तियारले प्रचलित कानूनबमोजिम अनुसन्धान गरी भ्रष्टाचार गरेको देखिएमा संलग्न व्यक्ति उपर कानूनबमोजिम अधिकारप्राप्त अदालतमा मुद्दा दायर गर्दै आएको विज्ञप्तिमा उल्लेख छ । यसरी मुद्दा दायर भई विशेष अदालतबाट प्राप्त फैसला उपर चित्त नबुझेमा सर्वोच्च अदालतमा पुनरावेदन गर्दै आएको अख्तियारको भनाइ छ । 

अख्तियारले भनेको छ, ‘ अदालतको निर्णयको सम्मान गर्दै आयोग न्यायिक स्वतन्त्रताप्रति पूर्ण प्रतिबद्ध रहेको, सम्मानित अदालतको गरिमाप्रति अनास्था फैलाउने विषय कल्पनासम्म पनि गर्न नसकिने र स्वतन्त्र न्यायपालिकाको अवधारणाप्रति सदाझैँ अविचलित रहने हुँदा आयोगबाट मिति २०७९।०७।२२ मा जारी गरिएको प्रेस विज्ञप्ति र जानकारीमूलक विवरणलाई सोही रुपमा बुझिदिनुहुन सम्बन्धित सबैमा आयोग हार्दिक आग्रह गर्दछ।’

आजै नेपाल बार एसोसिएसनले अख्तियार दुरुपयोग अनुसन्धान आयोगले आफू अनुकुलको फैसला गर्न दवाव दिने उद्देश्यले अदालतलाई आरोप लगाएको बताएको थियो  । नेपाल बार एशोसिएशन केन्द्रीय कार्यसमिति तथा उपत्यका बार एशोसिएशनका पदाधिकारीहरुको  बैठकले न्यायिक स्वतन्त्रतामा आघात पुर्याउने कार्य अख्तियारबाट भएको निष्कर्ष निकालेको थियो ।