नेकपा एमालेका अध्यक्ष केपी शर्मा ओलीले स्वतन्त्र पार्टीको उदय मामुली कुरा भएको बताएका छन् । 

चुनावमा विजयी भएपछि प्रमाणपत्र लिन झापा गएका ओलीले भद्रपुर विमानस्थलमा सञ्चारकर्मीसँग संक्षिप्त कुराकानी गर्दै मिडियाको कृपाका कारणले स्वतन्त्रहरूको उदय भएको दावी गरेका हुन् । 

उनले भने, ‘त्यो ठूलो कुरा होइन मामुली कुरा हो । धेरै उदय भनेर प्रचार प्रोप्रोगान्डा गरियो त्यो वास्तवमा तपाईंहरूको कृपा हो । देशलाई गलत बाटोतिर लैजाँदै हुनुहुन्छ ।’

ओलीले रवि लामिछाने नेतृत्वको राष्ट्रिय स्वतन्त्र पार्टीको गन्तव्य र अस्तित्वका बारेमा प्रश्न उठाएका छन् । ‘त्यो पार्टी ‘राष्ट्रिय स्वतन्त्र पार्टी) को के गन्तब्य हो ? के कार्यक्रम हो ? के नीति हो ? थाहा छैन । हा हा हु हु मा त देश चल्दैन । हा हु मा देश लैजाने कुरा नेपालको हितमा छैन’, ओलीले भने ।

ओलीले चुनावमा सत्ता गठबन्धनले शक्तिको दुरूपयोग गरेको आरोप पनि लगाए । उनले भने, ‘बुथ कब्जा गर्ने, हत्या गर्ने र राज्य संयन्त्रको दुरूपयोग गर्ने प्रवृत्ति देखियो । आतंक फिजाउने प्रवृत्ति देखियो । हेलिकप्टरबाट गुन्डा ओसारेर लैजाने प्रवृत्ति चिन्ताको विषय हो । सत्ता संरक्षित र सत्ता प्रायोजित गुन्डागर्दी र बुथ क्याप्चर, हिंसाजस्ता कुराहरू अशोभनीय र निन्दनीय छ ।’