अख्तियार दुरुपयोग अनुसन्धान आयोगको कार्यालय, इटहरीले ‘भ्रष्टाचारविरुद्धको अन्तर्राष्ट्रिय दिवस’को अवसरमा अन्तरक्रिया कार्यक्रम आयोजना गरेको छ । कार्यालयका शाखा अधिकृत दिवश अधिकारीले सञ्चालन गरेको कार्यक्रमको अध्यक्षता कार्यालय प्रमुख तीर्थराज चिलुवालले गरेका थिए । कार्यक्रममा निमित्त प्रदेश प्रमुख किशोर कुमार चौधरी प्रमुख अतिथिका रुपमा सहभागी भएका थिए । 

कार्यक्रममा प्रदेश मन्त्रालयका सचिवहरू, मोरङ र सुनसरीका प्रमुख जिल्ला अधिकारी, सुरक्षा निकायका प्रमुखहरू, सञ्चारकर्मी, मोरङ तथा सुनसरीका नागरिक निगरानी संस्था, सुनसरीस्थित कार्यालयका प्रमुखहरूलगायत कर्मचारीहरूको सहभागिता रहेको थियो । 

कार्यालयका सूचना अधिकारी उपसचिव निरजकुमार देवले कार्यक्रमको उपादेयता, औचित्य तथा नेपालमा भ्रष्टाचार अवस्था, भ्रष्टाचार सम्बन्धी उजुरीका क्षेत्रगत प्रवृत्ति, भ्रष्टाचार निवारण, सुशासन प्रबद्र्धन गर्नका लागि अवलम्बन गरेका रणनीति र सो को कार्यान्वयनको अवस्था एवं आयोगको आगामी कार्यदिशा बारेमा प्रस्तुतिकरण गरेका थिए । 

कार्यक्रममा सहभागीहरूले भ्रष्टाचार र अनियमितता सम्बन्धमा नागरिक तहबाट खबरदारी र प्रश्न गर्नुपर्ने, सञ्चारक्षेत्रबाट भ्रष्टाचारजन्य क्रियाकलापको खोजमूलक सामाग्री÷सूचना प्रशारण÷प्रकाशन गर्नुपर्ने, सार्वजनिक पदाधिकारीहरूबाट इमान्दारीपूर्वक तोकिएको जिम्मेवारी पूरा गरिनुपर्नेमा जोड दिएका थिए । 

छलफलको क्रममा नीतिगत भ्रष्टाचार परिभाषित हुनुपर्ने, निजी क्षेत्रलाई समेत भ्रष्टाचारको दायरामा ल्याउनुपर्ने, नराम्रो काम गर्नेलाई दण्ड दिने र राम्रो काम गर्नेलाई पुरस्कृत गर्ने संस्कृतिको विकास गर्नुपर्ने विषय उठेको थियो । सहभागीहरूले उजुरीको जोखिमका आधारमा वर्गीकरण गर्नुपर्ने, अन्तर निकाय सूचना प्राप्ति र उपयोगमा प्रभावकारी समन्वय हुनुपर्ने, भ्रष्टाचारको प्रवृति र स्वरुपमा परिवर्तन देखिएकोले अनुसन्धानको ढाँचामा परिवर्तन गर्नुपर्ने तथा नदीजन्य पदार्थ उत्खनन् कार्यको अनुगमन प्रभावकारी हुनुपर्नेलगायतका सुझाव दिएका थिए । 

कार्यक्रममा मोरङ र सुनसरीका प्रमुख जिल्ला अधिकारीहरूले सार्वजनिक निकायहरूको अभिमुखिकरण हुन नसकेको र कर्मचारीहरूमा सीप, ज्ञान एवं दक्षताको कमीले गर्दा प्रभावकारी सेवा प्रवाह हुन नसकेको बताएका थिए । 

प्रमुख अतिथि देवले सेवा प्रवाह र विकास व्यवस्थापनमा प्रणालीगत कमजोरी देखिएकोले सुधारका लागि सबै क्षेत्रबाट ऐक्यबद्धता, सहयोग, समन्वय, सहकार्य र साझेदारी आवश्यक रहेको बताएका थिए ।

कार्यालय प्रमुख चिलुवालले आयोगको कार्यलाई अझ बढी प्रभावकारी बनाउन भ्रष्टाचार नियन्त्रण एवं सुशासन प्रबद्र्धन गर्नका लागि बहुपक्षीय तथा द्विपक्षीय साझेदारी र सहकार्य आवश्यक रहेको धारणा राखे । उनले इमान्दारीपूर्वक तोकिएको जिम्मेवारी पूरा गर्न सबैलाई आग्रह पनि गरेका थिए ।