पटक–पटक सांसद र एकपटक उपप्रधानमन्त्री समेत भइसकेका ८२ वर्षीय चित्रबहादुर केसीलाई चुनाव जितेलगत्तै अर्को चटारो थपियो– काठमाडौंमा डेरा खोज्न ।

बाग्लुङबाट चौथोपटक निर्वाचित केसी मतदातालाई धन्यवाद दिने कार्यक्रम सम्पन्न गरेर हालै काठमाडौं आएका छन् । 

२०५६ सालमा प्रतिनिधिसभा निर्वाचन जितेर काठमाडौं आएका केसी झण्डै दुई दशकसम्म घट्टेकुलोस्थित एउटै डेरामा बसे । चित्रबहादुरको डेरा बसाइको संयोग कस्तो भने घरबेटीले घर बेचे, तर उनले डेरा छाड्नु परेन ।

कोरोना महामारीको समयमा केसी स्वेच्छाले काठमाडौंको डेरा छाडेर भैरहवास्थित छोरीको घरमा सरेका थिए । सम्भवतः उनले फेरि सांसद बनेर आउने आशा मारिसकेका थिए । नभए दुई दशक बसेको डेरा किन गुमाउँथे र ? कोरोनाको समयमा गम्भीर बिरामी परेपछि शारीरिक रूपले समेत कमजोर बनेका केसीले काठमाडौं छाडेका थिए । 

हालै सम्पन्न प्रतिनिधिसभा निर्वाचनमा केसी बाग्लुङ– १ बाट निर्वाचित भएपछि फेरि काठमाडौंमा डेरा आवश्यक भयो । 

उनले आफ्ना सहयोगीहरूलाई डेरा खोज्न लगाए, तर अहिलेसम्म भनेजस्तो कोठा पाइएको छैन ।  

‘संसद् भवन र सिंहदरबार जान गाडी चढ्न नपर्ने गरी बानेश्वर आसपासमा डेरा खोज्न लगाएको, फ्ल्याटको ४० हजार भनेछन्, त्यत्रो पैसा मैले कसरी तिर्नु ?’ केसीले लोकान्तरसँग भने, ‘पहिलेको जस्तो खोजेर त कहाँ पाउनु । जमानाअनुसार मलाई २० हजारसम्मको भए हुन्थ्यो । त्यो रकममा पाइएको छैन ।’

चुनाव जितेर काठमाडौं आएका केसी कपनस्थित पार्टी कार्यालयमा बसिरहेका छन् । 

‘बिहानदेखि बेलुकासम्म पत्रकारहरूले फोन गरेर हैरान गर्नुभएको छ । पार्टीको मिटिङ चलिरहेकाले म बाहिरै छु भनिरहेको छु,’ मंगलवार पार्टी कार्यालयमा पक्तिकारसँग कुरा गर्दै केसीले हाँस्दै भने, ‘अब त म काठमाडौंमै छु भनेर लेखिदिए पनि फरक परेन ।’ 

केसी काठमाडौं आएको थाहा पाउनासाथ पत्रकारहरू पार्टी कार्यालय र बस्ने ठाउँमा धाउने गरेका थिए । 

संसद्मा फेरि गुञ्जिनेछन् उखान टुक्का र झर्रा शब्द

उमेरले ८२ पुगे पनि केसीसँग उही पुरानो जोश बाँकी छ, २०५६ सालमा पहिलोपटक संसद्मा आउँदाको जस्तो । 

ज्येष्ठताका कारण सम्भवतः केसीले नै सांसदहरूलाई शपथ खुवाउने छन्, तर आवाज भने युवाको बोल्ने छन् ।

पश्चिम नेपालमा बोलिने लबजमा संसद्मा चित्रबहादुरले बोल्ने कुराले धेरैको ध्यानाकर्षण गर्ने गरेको छ । 

‘जनमोर्चा र नेमकिपा संसद्मा जनताको वास्तविक आवाज बोल्ने दल हुन् । उनीहरू खास प्रतिपक्ष एवं संसद्का गहना हुन्,’ संसद् सचिवालयका एक अधिकारीले भने ।

देशमा प्रजातन्त्र, लोकतन्त्र र गणतन्त्र आए पनि देश र जनताको जीवनस्तरमा सुधार नआएकोमा चित्रबहादुर अति चिन्तित छन् । फेरि पनि संसद्मा जनजीविकाका विषय नै उठाउने उनको योजना छ ।

‘बिहान छिट्टै ब्युँझेपछि मैले अस्तिको पत्रिकामा एउटा समाचार पढेको थिएँ, दैनिक ४ जनाको शव आउँछ रे विदेशबाट । दिनमा दुईहजार विदेशिने रहेछन्,’ केसीले भने, ‘हेर्नुस् त देशको अवस्था कहाँ पुग्यो ? यस्तो देशमा चार वर्षमा प्रदेशका २ सय ३० जना मन्त्री बनेछन् ।’

दुवै संविधानसभामा रहेका केसीले संघीयताको चर्को विरोध गरेका थिए । यसपटक पनि उनको एउटा मिसन संघीयताको विरोध गर्नु हुनेछ ।

‘प्रदेशको संरचनाप्रति कोही पनि सन्तुष्ट छैनन् । मानिसहरू वाक्कदिक्क भएका छन्,’ केसीले निष्कर्ष सुनाए, ‘मेरो विचारमा फेरि प्रदेशसभाका लागि चुनाव गर्नुपर्दैन । पाँच वर्षमा जनता थप दिक्क हुनेछन् ।’

संघीयता स्वीकार नगर्न गिरिजाप्रसाद कोइरालालाई आफूले भनेको उनले स्मरण गराए । 

‘संसद् बैठक चलिरहेको समयमा गिरिजाबाबुसँग भेट भएको थियो । मैले सोधें– संघीयता स्वीकार्नुभएछ, थामिन्छ त ? देशले धान्छ ?’ कोइरालाले फर्काएको जवाफ स्मरण गर्दै केसीले भने, ‘थामिन त के थामिन्थ्यो, संघीयता माग्दा ४० जनाको मृत्यु भयो । अहिले स्वीकार नगरे हजारजना मर्छन् भन्नुभयो ।’

यसपटक आफूलाई भोट दिएका कांग्रेसका कार्यकर्ताले संघीयताको विरोध गरोस् भन्ने आशा राखेको उनले सुनाए ।

‘कांग्रेसका सबैले त मलाई भोट हालेनन्, जतिले हाले उनीहरूको एउटै चाहना संघीयताको विरोध गरिदेओस् भन्ने थियो । धन्यवाद दिन जाँदा उनीहरूले मुखै फोरेर भने, संघीयताको विरोध गर्नुहुन्छ भनेर मात्र भोट दिएका हौं,’ केसीले भने । 

बाग्लुङमा जन्मेहुर्केका केसीको बोलीको लय अहिले पनि उस्तै छ । बोल्दा झर्रा शब्द र उखान टुक्काको प्रयोग गर्छन् । उनको शैलीलाई धेरैले मन पराउँछन् । 

चौथो चुनाव लड्दाको निष्कर्ष– सामान्य मान्छेले चुनाव लड्ने आँट नगरे हुन्छ

चौथोपटक चुनावी प्रतिस्पर्धा गरेका केसीले चुनाव लड्नै नसक्ने गरी महंगो भएको अनुभव सुनाए ।

अहिलेको प्रवृत्तिले चुनाव जितेका जनप्रतिनिधिले जनताको काम गर्ने भन्दा पनि खर्चपर्च उठाउनमै ध्यान केन्द्रित गर्ने खतरा रहेको उनले बताए ।

‘चुनाव त पहिला पनि लडेको थिएँ, तर यस्तो देखेको थिइनँ । जो तोले चुनाव लड्न आँट नगरे हुने भयो, यति बिग्रेर गएछ चुनाव । त्यसको दुष्परिणाम राष्ट्रले व्यहोर्नुपर्छ । प्रतिनिधिले चुनावमा मनपरी ढंगले गरेको चर्खपर्चको चिन्ता संसद्मा गएर गर्छन् जस्तो लाग्छ,’ केसीले भने । 

यति महंगो चुनाव जित्न केसी स्वयंले कति खर्च गरे त ?  जवाफमा उनले भने, ‘मसँग त खर्च थिएन । विरोधीले नै योसँग पैसा छैन, कसरी चुनाव जित्छ ? भने । मेरो प्यानलबाट चुनाव लडेका साथीहरूले तपाईंको संगतले गर्दा यसपटक ठूलो खर्चबाट बच्यौं भन्दै थिए ।’

२१ हजार ४ सय ६४ मतसहित केसीले बाग्लुङ– १ बाट निर्वाचित भएका हुन् । उनका निकटतम् प्रतिद्वन्द्वी एमालेका सूर्य पाठकले १८ हजार ८ सय ४५ र स्वतन्त्र पार्टीका खिमानन्द कंडेलले ९ हजार १ सय ९१ मत पाएका थिए । 

हेर्नुहोस्, भिडियो :