नेकपा (एमाले) का सचिव गोकर्ण बिष्टले आफूहरू सरकार निर्माणका लागि अवाञ्छित गतिविधिमा नलाग्ने बताएका छन् । आइतवार बुटवलमा पत्रकारहरूसँग कुराकानी गर्दै उनले एमालेले प्रतिपक्षमा बस्ने जनमत पाएको बताएका हुन् । 

सचिव बिष्टले आफूहरूले जनमतविपरीत सरकार निर्माणको लागि अवाञ्छित र गैर संसदीय गतिविधि नगर्ने बताए । उनले एमालेलाई सरकार गठनका लागि बाध्यता आइपरेमा भने पछाडि नहट्ने स्पष्ट पारे । विगतमा सरकार बनाउने नाममा गैरसंसदीय गतिविधि हुने गरेको भन्दै एमालेले जनचाहनाविरुद्ध काम नगर्ने बताए । सरकार बनाउनका लागि एमालेलाई हतारो नभएको उनको भनाइ छ । 

‘चाहे नेकपा(एमाले) सरकारमा रहँदा होस् । चाहे प्रतिपक्षमा रहँदा होस् लोकतन्त्र, संसदीय अभ्यास, जनताका अपेक्षालाई सम्मान गर्नेगरी लोकतन्त्रको मर्यादा र गरिमालाई माथि उठाउने गरी नै हामीले भूमिका निर्वाह गर्छौं । फेरि पनि हामीले हाम्रा घोषणाहरूमार्फत जनताको जीवनलाई परिवर्तन गर्नेदेखि देशलाई सबल बनाउने जुन प्रतिवद्धता व्यक्त गरेका छौँ । यदी आवश्यकता महशुस भयो भने, यदी हामीलाई त्यो प्रकारको जिम्मेवारी लिने बाध्यता भयो भने नेकपा (एमाले) जुनसुकै प्रकारको जिम्मेवारीसहित अगाडि बढ्न पनि पछि पर्दैन । तर, सरकार बनाउने नाममा विगतमा कतिपय अवाञ्छित गतिविधिहरू, गैरसंसदीय गतिविधिहरू जनताका रुची, आस्था, चाहानाविरुद्धका कामहरू हुने गर्दथे । त्यो प्रकारको बाटोमा नेकपा (एमाले) हिँड्दैन’, सचिव बिष्टले भने । 

उनले नेकपा (एमाले) लाई कमजोर बनाउनका लागि गत निर्वाचनमा वामपन्थीहरूले दक्षिणपन्थी शक्तिसँग गठबन्धन गरेका बताए । उनले नेकपा (माओवादी केन्द्र), नेकपा (एकीकृत समाजवादी) र राष्ट्रिय जनमोर्चामा वैचारिक विचलन देखिएको दाबी गरे ।