वाणिज्य बैंकहरूमा मंसिर महिनामा मात्रै ५८ अर्ब रुपैयाँ निक्षेप थपिएको छ । नेपाल बैंकर्स संघले जारी गरेको एक तथ्यांकअनुसार वाणिज्य बैैंकहरूमा कात्तिक महिनाको तुलनामा मंसिरमा मात्रै उक्त निक्षेप थप भएको छ । 

बैंकहरूमा कात्तिक मसान्तसम्ममा ४५ खर्ब ६३ अर्ब रुपैयाँ निक्षेप रहेको थियो । यस्तो निक्षेप मंसिर मसान्तसम्ममा ४६ खर्ब २१ अर्ब रुपैयाँ पुगेको छ । 

यस्तो निक्षेप सबैभन्दा बढी मंसिर अन्तिम साता थप भएको छ । मंसिर पछिल्लो साता २३ अर्ब रुपैयाँले बैंकिङ प्रणालीमा निक्षेप थप भएको छ । यस्तो निक्षेपबाट बैंकहरूले प्रवाह गरेको कर्जा लगानी भने करीब ठप्प छ । 

सञ्चालनमा रहेको विभिन्न २७ वटा वाणिज्य बैंकहरूले एक महिनामा प्रवाह गरेको कर्जा जम्मा २ अर्ब रुपैयाँ मात्रै छ । बैंकहरुले गत कात्तिक मसान्तसम्ममा २२ खर्ब ४२ अर्ब कर्जा प्रवाह गरेका थिए । यस्तो कर्जा मंसिर मसान्तमा २२ खर्ब २४ अर्ब रुपैयाँ मात्रै पुगेकोले कर्जा प्रवाह भने न्यून रकममा मात्रै भएको देखिएको छ ।