नेपाली फिल्म उद्योगकी चर्चित अभिनेत्री हुन् रेखा थापा । राजनीतिमा सक्रिय देखिएसँगै केही वर्ष भने उनी फिल्मबाट टाढा देखिएकी थिइन् ।

अब भने उनी राजनीतिसँगै फिल्ममा पनि उत्तिकै सक्रिय हुने तयारीमा छिन् । 

माघमा प्रदर्शनको तयारीमा रहेको फिल्म ‘ह्यारीकी प्यारी’को एउटा गीतमा रेखाले आइटम डान्स समेत गरेकी छिन् । बिहीवार राजधानीमा एक कार्यक्रमको आयोजना गर्दै उक्त गीत सार्वजनिक गरिएको थियो ।

गीत रिलिज कार्यक्रममा बोल्दै अभिनेत्री रेखाले आफू राजनीतिसँगै फिल्ममा पनि उत्तिकै सक्रिय रहने बताएकी हुन् ।

आफू दुईवटा फिल्मको तयारीमा रहेको बताउँदै रेखाले त्यसपछि आफू आमा बन्ने समेत खुलासा गरेकी छिन् ।

फागुनमा एउटा र बैशाखमा अर्को फिल्म छायांकनमा जाने तयारीमा रहेको उनको भनाई छ । त्यसमध्ये एउटा फिल्मको रिलिज असोजमा गर्ने उनको भनाई छ ।

कार्यक्रममा सन्तानबारे सोधिएको प्रश्नमा रेखाले भनिन् –‘भर्खर त म १६ वर्षकी भएँ । म अलि धार्मिक भएकाले जुर्नु पनि पर्छ भनिन्छ । यद्यपि, फिल्म र सन्तान भान्जा भान्जी सम्भवतः सँगसँगै देख्न सक्नुहुन्छ ।’

आफ्नो पहिलो प्राथमिकतामा फिल्म नै हुने रेखाको भनाई छ । आफूले फिल्म खेले पनि वा नखेले पनि फिल्म बनाउने उनको भनाई छ । कार्यक्रममा उनले ‘ह्यारीकी प्यारी’ राम्रो बनेको विश्वास समेत व्यक्त गरिन् ।