प्रदेश १ प्रदेश सभाको दोस्रो बैठक मंगलवार बस्दैछ ।

सोमवार बस्ने भनिएको बैठक नवनियुक्त मुख्यमन्त्री हिक्मत कार्कीको शपथ ग्रहणलाई असर पर्ने भन्दै मंगलवार सारिएको थियो । 

बैठक मंगलवार दिउँसो ११ बजे बस्ने छ । प्रदेश सभाको मंगलवारको बैठकले सभामुख निर्वाचनको मिति तोक्ने छ ।

आइतवार बसेको कार्यव्यवस्था परामर्श समितिको बैठकले पुस २८ गते सभामुखको निर्वाचन गर्ने सहमति गरेको थियो ।

उपसभामुखको निर्वाचन पुस ३० गते हुनेछ । मंगलवारको प्रदेशसभा बैठकले मिति तोक्नेछ । सभामुखको निर्वाचन कार्यतालिका सार्वजनिक गर्ने र मनोनयन पनि मंगलवार नै गर्ने तयारी रहेको प्रदेशसभा सचिवालयले जनाएको छ । 

सत्तारुढ गठबन्धनबीच भागबण्डा गर्दा प्रदेशको मुख्यमन्त्री नेकपा एमाले र सभामुख नेकपा माओवादी केन्द्रको भागमा परेको छ । मुख्यमन्त्री आलोपालो हुनुपर्ने माग राख्दै माओवादी सरकारमा सामेल भएको छैन । माओवादीले मुख्यमन्त्री हिक्मत कार्कीलाई समर्थन भने गरेको छ ।