नेपाली कांग्रेसका प्रभावशाली नेता डा. शेखर कोइरालाले प्रधानमन्त्री पुष्पकमल दाहाल ‘प्रचण्ड’लाई विश्वासको मतको पक्ष या विपक्षमा मतदान नगरी तटस्थ बस्नुपर्ने आफ्नो प्रस्ताव रहेको खुलाएका छन् ।

पार्टीले निर्णय गरिसकेको अवस्थामा आफूले प्रचण्डलाई भोट दिएको उनले बताए । लोकान्तरसँग कुरा गर्दै कोइरालाले विश्वासको मतबारे कांग्रेस तटस्थ बस्नुपर्थ्यो भन्नेमा आज पनि आफू अडिग रहेको बताए ।

‘कांग्रेस पदाधिकारी र कार्यसम्पादन समितिको बैठकमा विश्वासको मतका विषयमा दुईवटा विचार आयो, प्रचण्डलाई विश्वासको मत दिनुपर्छ भन्ने एउटा विचार र प्रतिपक्षमा बस्नुपर्छ भन्ने अर्को विचार,’ कोइरालाले लोकान्तरसँग भने, ‘यसरी दुईवटा विचार आएपछि यस्तो विषयमा विवाद गर्नुहुन्न, हामीले बीचको बाटो लिनुपर्छ र तटस्थ बस्नुपर्छ भन्ने विचार राखें । पार्टीले निर्णय गरेपछि मत त हाल्नै पर्‍यो, तर पनि हामी तटस्थ बस्नुपर्थ्यो भन्नेमा म अहिले पनि छु ।’

कांग्रेसमा संस्थापन इतर समूहको नेतृत्व गरिरहेका नेता कोइरालाले पार्टी प्रतिपक्षमै बस्ने बताए । उनले देशैभरका पार्टी कार्यकर्तालाई निराश हुनुपर्ने कारण नभएको पनि धारणा राखे ।

‘हामी सत्ता पक्ष होइनौं, कांग्रेसले सरकारमा कोही पनि पठाएको छैन र पठाउँदा पनि पठाउँदैन । हामी प्रतिपक्षमा छौं । प्रतिपक्षको बेन्च कांग्रेसकै हो । संसदमा प्रभावकारी प्रतिपक्षको भूमिका खेल्छौं,’ कोइरालाले लोकान्तरसँग भने ।

मंगलवार प्रतिनिधिसभा बैठकमा प्रधानमन्त्री प्रचण्डलाई विश्वासको मत दिएपछि पार्टीमा कांग्रेस नेतृत्वको आलोचना भएको छ ।