काठमाडौंबाट पोखराका लागि उडेको यती एयरलाइन्सको विमान दुर्घटनाग्रस्त भएको छ । ९ एन एटीआर ७२ विमान पोखरा रंगशालानजिकै सेती खोंचमा दुर्घटनामा परेको हो ।

विमानमा चालक दलका ४ सदस्यसहित ७२ जना सवार रहेको यती एयरलाइन्सले जनाएको छ ।​ 

दुर्घटनास्थलबाट कम्तीमा ३२ शव निकालिएको प्रमुख जिल्ला अधिकारी टेकबहादुर केसीले जानकारी दिए ।

'हामीले कसैलाई जीवितै उद्धार गर्न सकिन्छ कि भनेर हर सम्भव प्रयास गरेका छौं । तर, दुर्भाग्यवश: अहिलेसम्म कसैलाई पनि जीवित उद्धार गर्न सकेका छैनौं,' केसीले भने ।

विमान क्याप्टेन कमल केसी र को-पाइलट अञ्जु खतिवडाले उडाएका थिए ।

त्रिभुवन अन्तर्राष्ट्रिय विमानस्थलका महाप्रबन्धक प्रेमनाथ ठाकुरका अनुसार विमान अवतरण हुने बेलासम्म चालक दलका सदस्य विमानस्थलको टावरसँग सम्पर्कमै थिए ।

'विमान लगभग फाइनल ल्यान्डिङ फिनिश गर्ने क्रममा नै दुर्घटना भएको हो,' उनले लोकान्तरसँग भने, 'विमान दुर्घटना हुने बेलासम्म पनि टावरसँग चालकको सम्पर्क छँदै थियो। तर पनि चालकले टावरलाई केही भनेको पाइएन ।'

विमान दुर्घटनाको यकिन कारण खुल्न नसकेको उनले बताए । 'छानबिन समितिले छानबिन गरेपछि मात्र दुर्घटनाको यकिन कारण खुल्ला,' उनले भने ।