बलात्कार मुद्दामा तनहुँ जिल्ला अदालतबाट सफाइ पाएका अभिनेता पल शाहलाई समर्थकले बधाई दिएका छन् । अदालत परिसरबाट बाहिरने क्रममा समर्थकहरुले नाराबाजीसहित उनलाई बधाई दिएका हुन् । सुरक्षा घेरामा अदालतबाट बाहिरिने क्रममा उनलाई समर्थकले ‘पलजी बधाई छ है’ भन्दै खुसी मनाएका थिए । जवाफमा पलले थ्याङ्क्यु (धन्यवाद) भन्दै अभिभावदन समेत गरेका थिए । 

क्याप र मास्क लगाएर अदालत परिसरबाट बाहिरिएका उनी सेतो कारमा बसेर जेलतिर गएका थिए । उनी अदालत परिवारबाट बाहिरिँदै गर्दा मन्द मुस्कानमा देखिन्थे भने सो क्रममा केही समर्थकसँग हातसमेत मिलाउँदै पछि बेट्ने बाचा गरेका थिए । गाडीबाहिर हुँदा सम्म मास्क लगाएका उनले गडाीभित्र बसेपछि भने उनले मास्क खोलेका थिए । 

समर्थकहरुले पल शाहको पक्षमा जिन्दावादको नारा समेत लगाएका थिए । 

नाबालिका बलात्कारको अभियोगमा शाहलाई तनहुँ जिल्ला अदालतका  न्यायाधीश कोमलप्रसाद आचार्यको इजलासले सफाइ दिए पनि उनी तत्काल जेलमुक्त भने हुने छैनन् । त्यसले उनी अदालतको फैसलापछि जेलतिरै जानु परेको हो ।

बलात्कारको अभियोगमा जिल्ला अदालत नवलपुर र तनहुँमा शाहविरुद्ध मुद्दा चलेको थियो । नवलपुर अदालतले बलात्कार मुद्दामा सफाइ दिए पनि बाल यौन दुरुपयोगको आरोपमा २ वर्ष ६ महिना जेल सजाय र पीडितलाई १० लाख रुपैयाँ क्षतिपूर्ति दिनुपर्ने फैसला गरेको थियो ।

सोही कारण नवलपुर अदालतले तोकेको सजाय काटेपछि मात्र शाह जेलमुक्त हुनेछन् ।