नेकपा (माओवादी केन्द्र) का सचिव देवेन्द्र पौडेलले राष्ट्रपतिमा राष्ट्रिय सहमति खोज्ने कामको नेतृत्व नेकपा (एमाले) ले लिनुपर्ने बताएका छन्।

आइतबार प्रतिनिधि सभाको बैठकपछि सञ्चारकर्मीसँग संक्षिप्त कुराकानी गर्दै सचिव पौडेलले एमालेको लागि झनै राष्ट्रिय सहमति आवश्यक भएको तर्क गरे।

उनले गठबन्धनलाई जोगाउँदै अन्य दललाई पनि गठबन्धनमा सामेल गर्नु आवश्यक रहेको बताए।

प्रधानमन्त्री पुष्पकमल दाहालले गठबन्धन जोगाउन सबैसँग छलफल गरिरहेका पनि बताए।

उनले भने, ‘कसैलाई हटाउने, कसैलाई निकाल्ने हाम्रो केही उद्देश्य पनि छैन । लक्ष्य पनि छैन । सबैलाई मिलाएर लाने प्रयत्न रहन्छ । एमाले पार्टी देशको प्रमुख पार्टी भएको हुनाले राष्ट्रिय सहमति झन चाहिनुपर्ने हो नि । उहाँहरूकै नेतृत्वमा त्यो भूमिका खेल्दा त झन सुनमा सुगन्ध हुनुपर्ने हो नि । त्यसकारणले राष्ट्रसामु उपस्थित समस्याहरूलाई मिलाएर जाऔँ भन्ने कुरामा एमाले रुष्ट हुनुपर्ने के कारण छ ?’