नेपाली कांग्रेसका नेता मीनेन्द्र रिजालले प्रचण्डकै कारण कांग्रेसले अन्य दलसँग एकै ठाउँमा उभिने बाध्यता आउन सक्ने बताएका छन्। 

शुक्रवार न्युज एजेन्सी नेपालसँग कुराकानी गर्दै उनले हतार हतारमा पुरानो गठबन्धन छोडेर प्रधानमन्त्री बन्नकै लागि प्रचण्डले नयाँ गठबन्धन बनाएका आरोप लगाए। 

'नयाँ गठबन्धन प्रचण्डजीले बनाउँदा त्यसले गठबन्धनको मुल कार्यभारलाई बोक्ने व्यक्ति मात्रै राष्ट्रपति हुनुपर्छ भन्ने भाव रह्यो,' रिजालले भने, 'त्यस्तो राष्ट्रपति बन्यो भने प्रधानमन्त्रीले संविधानले दिएको भूमिका गर्न सक्दैन भन्ने प्रचण्डजीको मनमा संशय पनि, त्रास पनि पैदा भयो । त्यो संशय र त्रासबाट उनले अर्को राजनीतिक गठबन्धन खोजी गर्नुभयो ।'

रिजालले थपे, 'प्रचण्डले पुरानो गठबन्धनबाट फिर्ता हुने कोशिस गरे र कांग्रेसलाई पनि त्यत्रो क्षतिबाट निस्किन, उम्किन, न्यूनीकरण गर्न नयाँ बाटोको खोजी गर्नुपर्ने हुन्थ्यो । दुई वटै स्वार्थ मिल्यो । हाम्रो पार्टीको पनि उहाँसँग स्वार्थ मिल्यो । त्यसअर्थमा उहाँलाई हामीले समर्थन गर्‍यौँ । उहाँको समर्थनबाट रामचन्द्र पौडेल राष्ट्रपति निर्वाचित हुनुभएको छ । तर हामी सबैले बुझ्नुपर्ने कुरा के होभन्दा रामचन्द्र पौडेलले संविधानभन्दा बाहिर गएर यो गठबन्धनको राजनीतिको साक्षीको रूपमा, यो गठबन्धनको सहमतिलाई कार्यान्वयन गर्ने राष्ट्रपतिको रूपमा काम गर्नुहुन्न ।'

नवनिर्वाचित राष्ट्रपति रामचन्द्र पौडेलले गठबन्धनको सहमति कार्यान्वयन गर्ने राष्ट्रपतिको रूपमा काम गर्नु नहुने पनि उनले बताए। 

'तर एउटा कुरा प्रधानमन्त्रीजीलाई मेरो सुझाव छ, प्रधानमन्त्रीले अब यो गठबन्धनका बीचमा भएका शर्तहरूलाई जिम्मा लिएर उहाँले राष्ट्रपतिको भूमिका गर्नुपर्छ भन्ने सोच्नुभयो भने त्यो भूमिका उहाँले गर्ने होइन । त्यो भूमिका पार्टीले गर्छ । पार्टीको सभापतिले गर्नुहुन्छ । नेपाली कांग्रेस पार्टीले गर्छ । त्यो भूमिकामा नेपाली कांग्रेस इमानदार भएर बस्नुपर्छ भन्ने लाग्छ मलाई । त्यो भूमिकामा कांग्रेस इमानदार हुन्छ’, रिजालले भने। 

उनले राष्ट्रपति पौडेल गठबन्धनको परिधिभित्र नबस्ने पनि बताए।