आचारसंहिता उल्लंघन गरेको भन्दै निर्वाचन आयोगले नेपाली कांग्रेसलाई स्पष्टीकरण सोधेको छ। 

बुधबार बसेको कांग्रेस कार्यसम्पादन समितिको बैठकले उपराष्ट्रपति पदका उम्मेदवार रामसहायप्रसाद यादवलाई मतदान गर्ने निर्णय गरेको थियो। 

तर उक्त निर्णय राष्ट्रपति तथा उपराष्ट्रपति निर्वाचन निर्देशिका, २०७४ को दफा ६२ ( १ ) विपरीत भएको आयोगको ठहर छ। 

आचारसंहिता उल्लंघन गरेको उजुरी पर्न आएकाले आयोगले नेपाली कांग्रेसलाई किन कारबाही हुनु नपर्ने भनी लिखित जवाफ माग गर्नुका साथै आचारसंहिता पूर्ण पालना गर्न ध्यानाकर्षण गरेको बुधबार साँझ जारी गरिएको विज्ञप्तिमा जनाइएको छ। 

विज्ञप्तिमा भनिएको छ-  ललितपुर क्षेत्र नं. ३ प्रतिनिधि सभा सदस्य माननीय श्री प्रेम बहादुर महर्जनले नेपाली कांग्रेस केन्द्रीय कार्य सम्पादन समितिको बैठकले उपराष्ट्रपति पदका उम्मेदवार माननीय श्री रामसहाय प्रसाद यादवलाई मत दिने निर्णय सार्वजनिक गरेको हुँदा राष्ट्रपति तथा उपराष्ट्रपति निर्वाचन निर्देशिका, २०७४ को दफा ६२ ( १ ) विपरित आचारसंहिता उल्लङ्घन गरेकोले कानून वमोजिम कारवाही गरी पाउँ भनी उजुरी पर्न आएकोले नेपाली कांग्रेस केन्द्रीय कार्यालय, सानेपा ललितपुरलाई उजूरी माग बमोजिम किन कारबाही हुनु नपर्ने हो भनी लिखित जवाफ माग गर्नुका साथै आचारसंहिताको पूर्ण परिपालनाका लागि सो दललाई ध्यानाकर्षण समेत गराई सकिएको छ ।

उपराष्ट्रपति निर्वाचनको प्रचारप्रसार गर्न नपाइने मौन अवधि शुरू भइसकेको अवस्थामा रामसहायप्रसाद यादवलाई भोट हाल्न सांसदलाई निर्देशन दिएपछि नेकपा एमालेले आयोगको ध्यानाकर्षण गराएको थियो। 

आचारसंहिता उल्लंघनको निर्णय गर्ने नेपाली कांग्रेसलाई कारबाहीको दायरामा ल्याउन निर्वाचन आयोगमा एमाले उजुरी दिएको हो। 

उपराष्ट्रपतिको निर्वाचनका लागि मंगलबार राति १२ बजेबाट मौन अवधि शुरू भएको छ।