नयाँ वर्षको अवसर पारेर वैशाख १ गतेबाट प्रदर्शनमा आउने फिल्म ‘बुलाकी’को राजधानीमा विशेष शो आयोजना गरिएको छ । 

प्रदर्शनको दुई दिनअघि बुधबार साँझ गरिएको विशेष शोमा थुप्रै फिल्मकर्मीका साथमा सञ्चारकर्मीले कर्णालीको कथामा आधारित फिल्म हेरेका छन् । सुरक्षा पन्त र नरेन खड्काको मुख्य भूमिका रहेको ‘बुलाकी’को कथावस्तु, प्रस्तुति र कलाकारको अभिनयको प्रशंसा विशेष शोमा फिल्म हेरेका फिल्मकर्मीहरूले गरेका छन् ।

लक्ष्मण सुनार निर्देशित यस फिल्मले मल्टिप्लेक्समा राम्रो शोज पाएको छैन । प्रदर्शकहरुले फिल्मलाई चेपुवामा पारेको गुनासो निर्माताको छ । तर, फिल्मले विशेष शोमा पाएको प्रतिक्रियाबाट भने निर्माता उत्साहित छन् ।

फिल्म हेर्न पुगेका सांसद ज्ञानेन्द्र शाहीले कलाकारको अभिनय, संवाद, कर्णालीको कथालाई मार्मिक ढंगले प्रस्तुत गरिएको बताए ।

निर्देशक दिनेश डीसीले पनि ‘बुलाकी’ उत्कृष्ट बनेको बताए ।

अभिनेत्री नीता ढुंगानाले फिल्म हेर्दा छुट्टै आनन्दको अनुभूति भएको सुनाइन् । त्यस्तै अभिनेता हरिहर अधिकारीले पनि नेपाली फिल्ममा मौलिक कथा भन्न आवश्यक रहेको सुनाए । अभिनेता पुष्प खड्का, गजित बिष्ट, राज कटुवाल, मुकुन भुषाल, निर्देशक ज्ञानेन्द्र देउजा लगायतले पनि फिल्मले पुरा समय बाँधेर राखेको सुनाए । फिल्मकर्मीहरूले अभिनेत्री सुरक्षा पन्त, अभिनेता नरेन खड्कादेखि डेब्यू अभिनेता विराज विष्टको अभिनयको पनि प्रशंसा गरे । 

निर्देशक लक्ष्मण सुनारले कर्णालीको कथा अझै धेरै भन्न बाँकी रहेको सुनाए । फिल्म हेर्नका लागि निर्देशक नवल नेपाल, कलाकार प्रशान्त ताम्राकार, हरिष निरौला (क्रकोच) लगायत पनि पुगेका थिए ।

फिल्म ‘बुलाकी’मा कर्णालीको ग्रामीण जीवन, रीतिरिवाज, जारी प्रथा तथा परिवार र सम्बन्धमा आउने आरोह-अवरोहलाई प्रस्तुत गरिएको छ ।

सुरक्षा, नरेन र बिराजका साथमा रमेश बुढाथोकी, लक्ष्मी गिरी, कुलदीप अधिकारी, सुशील पोखरेल, झलनाथ खत्री, धनवहादर राई, लक्ष्मण देवकोटा, बसन्त उदास, सोनु सेढाइ, प्रकाश कँडेल, सरस्वती खत्री लगायतको पनि अभिनय छ । 

छत्रेश्वरी म्यानेजमेन्टको ब्यानरमा स्व.मोती विष्टको प्रस्तुति रहेको फिल्म शिव ढकालले खिचेका हुन् ।

अर्जुन जिसीले सम्पादन गरेको फिल्ममा राज बहादुर सानेको कथा, राजबहादुर साने, निर्मल पौडेल र निर्देशक सुनार तथा अभिनेता विष्टको पटकथा तथा संवाद रहेको छ ।