शुक्रबारबाट प्रदर्शनमा आएको फिल्म ‘जारी’लाई फिल्मकर्मीहरूले प्रशंसा गरेका छन् । 

फिल्मको बिहीबार राजधानीमा भव्य प्रिमियर शोको आयोजना गरिएको थियो । प्रिमियर शोमा अतिथिका रुपमा पुगेका अधिकांश फिल्मकर्मीहरूले खुलेर प्रसंशा गरेका हुन् ।

कवि तथा राजनीतिज्ञ पनि उपेन्द्र सुब्बा निर्देशित ‘जारी’ हेर्न हल पुगेका थिए ।

हलबाट निस्कँदै गर्दा अधिकांशले ‘जारी’ उत्कृष्ट मौलिक नेपाली फिल्म बनेको भन्दा प्रशंसाका शब्दहरु व्यक्त गरेका थिए । 

निर्देशक निश्चल बस्नेत, निर्माता तथा अभिनेता खगेन्द्र लामिछाने, निर्देशक तथा वितरक प्रचण्डमान श्रेष्ठ, निर्माता सरोज न्यौपाने, लेखक प्रदीप भारद्धाज, अभिनेता अरुण क्षेत्री, राजन खतिवडा, अनुप बराल, अभिनेत्री ऋचा शर्मा, सिर्जना लिम्बु, वर्षा सिवाकोटी, बेनिशा हमाल, अञ्जना बराईली, कवि नवराज वाग्ले, विप्लप प्रतीक लगायतले प्रिमियरमा फिल्म हेरेका थिए । 

प्रिमियर शोमा उत्कृष्ट प्रतिक्रिया पाएपछि डेव्यू निर्देशक उपेन्द्र सुब्बा, अभिनेता दयाहाङ राई, अभिनेत्री मिरुना मगर, विजय बराल, कमलमणि नेपाल, परिक्षा लिम्बु हर्षित देखिन्थे । फिल्म छायांकनको करिब ३ बर्ष ५ महिनापछि रिलिज हुँदा निकै खुशी लागेको अभिनेता राईले बताए ।

यस्तै, अभिनेत्री मिरुना मगरले आफूले कबड्डी ४ भन्दा पहिले अभिनय गरेको फिल्म ‘जारी’ भएकाले पनि आफ्नो लागि यो फिल्म विशेष रहेको बताइन् । निर्देशक सुब्बाले फिल्म लेख्नभन्दा निर्देशन गर्न निकै गाह्रो रहेको अनुभव सेयर गर्दै केही दिनयता जारी के होला ? दर्शकलाई मन पर्ला की नपर्ला ? भन्ने पीरले सुत्न नसकेको बताएका थिए । 

‘जारी’ प्रथामा आधारित रहेको फिल्ममा लिम्बु संस्कृति र भेषभूषा पनि झल्किन्छ । ब्लकबस्टर फिल्म ‘कबड्डी ४’पछि दयाहाङ र मिरुनाको जोडीको ‘जारी’ प्रदर्शनमा आएको हो । ​

यस फिल्मका निर्माता सफल निर्देशक रामबाबु गुरुङ हुन् । फिल्मले शुक्रवार देशभरका हलमा आक्रामक व्यापार गरिरहेको छ ।