सन्दीप लामिछानेले शुक्रबार ओमानविरुद्ध एकदिवसीय क्रिकेटमा सबैभन्दा कम ४२ खेल खेल्दै छिटो एक सय विकेट लिने विश्व कीर्तिमान कायम गरेका छन् ।

यस क्रममा सन्दीपले अफगानिस्तानका राशिद खानको रेकर्ड तोड्दै विश्वकीर्तिमान कायम गरेका हुन् ।

राशिदले ४४ खेलमा एक सय विकेट लिएर यस अघि यो कीर्तिमान आफ्नो नाममा लेखाएका थिए ।

तर नेपालका सन्दीपले यो दुर्लभ कीर्तिमान आफ्नो नाममा लेखाएका हुन् । 

सन्दीपले विश्व कीर्तिमान आफ्नो नाममा लेखाएपछि विश्वभरका मिडियाले प्राथमिकता दिएर यो समाचार प्रस्तुत गरेका छन् । 

यसैबीच क्रिकेटसम्बन्धी अनलाइन क्रिकइन्फोले पनि सन्दीपले कम खेलमा पुरुष एकदिवसीयतर्फ १०० विकेटको कीर्तिमान तोडेको भन्दै चर्चा गरेको छ ।

तर सँगै उसले कम बल फालेको आधारमा भने यो रेकर्ड अझै पनि राशिदसँग रहेको उल्लेख गरेको छ । तर कम बल फालेकै आधारमा भने कीर्तिमानको हिसाब हुँदैन । खेल संख्याकाे आधारमा नै यो रेकर्ड कायम हुने हो । 

सन्दीपले ४२ म्याचमा १०० विकेट लिँदा २२२५ बल फालेका छन् । तर राशिदले २१३९ बल फालेर ४४ खेलमा एक सय विकेट पूरा गरेका थिए । 

क्रिकइन्फोले यस्तो विवरण दिए पनि सन्दीपलाई पहिलो नम्बरमा राखेरै सामाजिक सञ्जालमा फोटो सेयर गरेको छ ।