पाल्पा सदरमुकाम तानसेनमा बिहीवारदेखि सुरु भएको ‘पाल्पा महोत्सव’मा हरेक दिनजसो चर्चित कलाकारहरूको प्रस्तुति रहने भएको छ ।

पाल्पा उद्योग वाणिज्य संघको मुख्य आयोजनामा सुरु भएको १३ संस्करणको महोत्सवमा चर्चित गायक शिव परियार, पशुपति शर्मादेखि पछिल्लो पुस्ताकी चर्चित गायिका एलिना चौहानसम्मको प्रस्तुति रहने भएको सांस्कृतिक संयोजक भीम बहादुर श्रेष्ठले जानकारी दिए ।

महोत्सवमा दोस्रो दिन शुक्रवार चर्चित गायक राजु परियारसहितका कलाकारहरूको प्रस्तुति रहने भएको छ । त्यस्तै शनिवार गायक शिव परियारले प्रस्तुति दिनेछन् । 

बद्री पंगेनी, खुमन अधिकारी, रामजी खाँण, शिरीष देवकोटा, पुस्कल शर्मादेखि शान्तिश्री परियार, ज्योति मगर, मन्जु पौडेलसम्मका कलाकारहरूको प्रस्तुति महोत्सवमा रहनेछ । 

महोत्सवमा पाल्पामा जन्मिएर कला क्षेत्रमा सक्रिय चर्चितदेखि स्थानीय कलाकारहरूलाई बढी प्राथमिकता दिइएको छ ।

टुँडिखेलमा सुरु भएको यो महोत्सव वैशाख २४ गतेसम्म महोत्सव चल्नेछ ।