नेकपा एमालेका सचिव योगेश भट्टराईले  नेपाल प्रहरीका लागि राजनीतिक अपराधको जालो नष्ट गर्ने उपयुक्त अवसर प्राप्त भएको बताएका छन् । 

भट्टराईले शुक्रवार सामाजिक सञ्जालमार्फत शरणार्थी प्रकरणमा भएको राजनीतिक अपराध र अपराधको राजनीतिकरणको जालो नष्ट गरेर प्रहरीको छवि उज्यालो पार्ने उपयुक्त अवसर प्राप्त भएको बताएका हुन् ।

सरकार, मानव तस्कर र प्रशासनिक नेतृत्वको अगुवाइमा नागरिकलाई अनागरिक बनाउनु राष्ट्रद्रोहसमेत भएको उनको भनाइ छ । ‘नक्कली भुटानी शरणार्थी केस सामान्य अपराध मात्र होइन, मानव तस्करी र बेचबिखनमा सरकारको राजनीति र प्रशासनिक नेतृत्व कै अगुवाइमा भएको राष्ट्रद्रोह हो' उनले सामाजिक सञ्जालमा लेखेका छन् ।

'आफ्नै नागरिकलाई अनागरिक बनाएर विदेशिन बाध्य बनाउनेलाई निन्दा र भर्त्सना गर्ने कुनै पनि शब्द नै छैन । नेपाल र नेपालीको आत्मसम्मानमाथि अपूरणीय क्षति पुगेको छ’ भट्टराईले सामाजिक सञ्जालमा लेखेका छन्, ‘पार्टी र राज्यको सांस्कृतिक अधःपतनलाई सुद्धिकरण गर्ने, व्यवस्थाप्रति जनविश्वास जाग्रित गर्ने, राजनीतिको अपराधीकरण र अपराधको राजनीतिकरणको जालो नष्ट गर्ने र नेपाल प्रहरीको छवि उजिल्याउने उपयुक्त अवसर हो यो ।’

यस अघि अप्ठ्यारो घटनामा पनि प्रहरी काबिल भएको भन्दै उनले विना दबाब अनुसन्धान अगाडि बढाउन आग्रह गरेका छन् । ‘साधन र स्रोतका बाबजुद अपराधीक घटनाको छानबिन गरी सत्य-तथ्य बाहिर ल्याउन नेपाल प्रहरी सक्षम छ । विगतमा कतिपय जटिल र अप्ठ्यारो ठानिएका घटनामा नेपाल प्रहरीले आफूलाई काबिल साबित गरेको छ’ उनले भनेका छन्, ‘प्रहरीको अनुसन्धानमाथि बाह्य दबाब, राजनीतिक हस्तक्षेप र स्वार्थ समूहले रोटी सेक्न खोज्दा अनुसन्धान कसरी बरालिन्छ भन्ने कुरा निर्मला पन्त काण्डबाट नेपाल प्रहरीले पाठ सिकेकै होला ।’

यसले प्रहरीलाई शरणार्थी प्रकरणमा स्वतन्त्र ढंगले छानबिन गर्न दिनुपर्ने, राजनीतिक दबाव र पक्षधरताबाट मुक्त राख्नुपर्ने उनको भनाइ छ ।