फिल्म ‘ए ढाक्रे दाई’ साउनमा दर्शकमाझ आउने भएको छ । करिब ६० वर्षअघिको ढाक्रे जीवनशैलीलाई पर्दामा उतारिएको फिल्म साउन ५ गतेबाट प्रदर्शनमा आउने भएको निर्देशक निरंजन कसजू (माइला)ले जानकारी दिए । 

आफूले ६ दशकअघिको ऐतिहासिक विषयमा फिल्म निर्माण गरेको कथाकार र निर्मातासमेत रहेका निर्देशक कसजूले बताए । ‘त्यतिबेला पहाडतिरबाट कयौं दिन हिँडेर ढाक्रेहरू बटौली बजार आउँथे र जडीबुटी, घिउ, भटमास त्यहाँ बेचेर नुन, तेल, लत्ता कपडालगायतका अत्यावस्यक सामाग्रीहरु किनेर लैजान्थे,’ निर्देशक कसजू भन्छन्, ‘हाम्रा अग्रजहरूले खेपेको सोही दुःख, कष्टको जीवन भोगाइलाई फिल्ममा प्रस्तुत गरेको छु ।’ 

उनले तत्कालिन ऐतिहासिक ग्रामीण जीवनलाई अहिलेको पुस्ताले पर्दामा भए पनि हेरुन भनेर फिल्म निर्माण गरेको बताए । 

फिल्ममा ध्रुव कोइराला, मिनुज रानामगर, माया थामी, उषा फौजालगायतले अभिनय गरेका छन् । सुमन थापाको छायाँकन रहेको फिल्ममा सुरेश सेन्चुरीको संगीत, एन के एम र तेजप्रसाद पाण्डेको शब्द, लोकेन्द्र शाह र एन के एमको नृत्य निर्देशन छ । ​

यूनिक मुभीजको प्रस्तुतिमा राजन कसजू सह निर्माता रहेको फिल्मको सम्पादन विजय पोखरेल र अर्जुन पोखरेलले गरेका हुन् ।