लामो पखाईपछि नागरिकता पाएका पश्चिम नवलपरासीका युवाले अविर जात्रा गरी खुशी मनाएका छन् ।

जिल्ला प्रशासन कार्यालयबाट सोमवार नागरिकता लिएर बाहिरिँदै गरेका युवाहरूमा खुशीको सीमा थिएन ।

हातमा नागरिकता लिएकाहरूका आँखाबाट खुशीका आँसु झरे । सर्वोच्च अदालतले बिहीवार नागरिकता विधेयक प्रमाणीकरण गर्ने राष्ट्रपतिको निर्णय कार्यान्वयन नगर्न दिएको अल्पकालीन अन्तरिम आदेशलाई निरन्तरता नदिएपछि त्यस्ता व्यक्तिहरूका लागि नागरिकता पाउने बाटो खुलेको हो ।

नागरिकता पाएपछि अर्का साथीलाई अबिर दल्दै गरेका रामग्राम नगरपालिका–२ का निरज बनिया (२०) ले नागरिकता देखाउँदै भने, ‘मलाई खुशीको सीमा नसोध्नुस् । यो नागरिकता १५ दिनसम्म छातीमा टाँसेर सुत्छु ।’

नागरिकता नपाउँदा मोबाइलको सीम कार्ड समेत निकाल्न नपाएको उनको गुनासो थियो । ढिलै भए पनि सरकारले न्याय गरेको उनको भनाइ थियो ।

निरज मात्र होइन, उनीजस्तै वर्षौंदेखि नागरिकता पाउनबाट वञ्चित जन्मको आधारमा नागरिकता पाएका अभिभावकका सन्तानले अब सहज रूपमा नागरिकता पाउने छन् । नागरिकता लिएर प्रशासनबाट बाहिरिँदै गरेकी बर्दघाट नगरपालिकाकी निता गुप्ताले नागरिकता नहुँदा पढाइमा समेत समस्या भएको बताइन् । 

‘म अहिले ब्याचलर फाइनल दिएर बसेकी छु । नागरिकताकै कारण मैले सोचेका सबै सपना अधुरै हुने पीरले सताइरहन्थ्यो । अब भविष्यको सपना पूरा हुने भो !’ 

नागरिकता नहुँदा आफ्नै देशमा पनि हजारौं युवाहरू शरणार्थी जस्तो भएर बस्नुपर्ने बाध्यता हटेकाले अब देशमै बसेर केही गर्ने सोच बनाएको उनले बताइन् । नागरिकताका लागि सँगै आएकी उनकी आमा संगीता गुप्ताले छोरीसँग अन्य ३ सन्तानले नागरिकता पाउन लागेको भन्दै खुशी व्यक्त गरिन् ।

जिल्ला प्रशासनमा अहिले जन्मको आधारमा नागरिकता पाएका अभिभावकका सन्तानहरू नागरिकता बनाउन आउन थालेपछि भीडभाड बढेको छ । जिल्लामा त्यस्ता प्रकृतिका करीब २० हजार बढी सन्तानले नागरिकता पाउने छन् । भीडभाड बढेपछि जिल्ला प्रशासनले त्यस्ता प्रकृतिका नागरिकता वितरण गर्न थप अधिकृत र कर्मचारीको व्यवस्था गरेको प्रमुख जिल्ला अधिकारी (सीडीओ) विश्वप्रकाश अर्यालले बताए । जिल्लामा जन्मको आधारमा नागरिकता पाएका अभिभावकको संख्या ८ हजार १३० रहेको प्रशासनले जनाएको छ । त्यसमध्ये ती अभिभावकका सन्तानलाई वंशजको आधारमा २०७० र २०७४ सालमा नागरिकता वितरण गरिएको थियो ।

त्यसबेला जन्मको आधारमा नागरिकता पाएका अभिभावकका १ हजार ९०८ जना सन्तानले वंशजको नागरिकता पाएका थिए ।