१७ वर्षअघि रौतहटको गौरमा भएको हत्याकाण्ड छानबिन सम्बन्धमा सरकारले गरेको नयाँ सहमतिलाई लिएर जनता समाजवादी पार्टी (जसपा)ले चरम असन्तुष्टि जनाएको छ ।

उसले पुष्पकमल दाहाल 'प्रचण्ड' नेतृत्वको वर्तमान सरकार नै छाड्नेसम्मको चेतावनी समेत दिएको छ ।  

सरकार र गौर हत्याकाण्डपीडितबीच सहमति भएलगत्तै जसपा अध्यक्ष उपेन्द्र यादवले सत्ता र प्रतिपक्षी दलका नेतासँग भेटवार्ता बढाएका छन् ।

सरकारले गौर हत्याकाण्डपीडितसँग सहमति गरेलगत्तै उपेन्द्रले कांग्रेस सभापति शेरबहादुर देउवासँग मंगलवार सिंहदरबारमा भेटेर सरकार छाड्ने चेतावनी दिएका थिए । 

‘नक्कली भुटानी शरणार्थी प्रकरणमा सरकारले तपाईंमाथि अन्याय गर्‍यो, बालकृष्ण खाँणलगायतका नेतालाई पक्राउ गरायो । अहिले मलाई अप्ठ्यारो पार्न खोज्दैछ,’ देउवासँगको भेटमा उपेन्द्रको भनाइ उद्धृत गर्दै जसपा उच्च स्रोतले लोकान्तरसँग भन्यो । 

देउवाले भने प्रधानमन्त्री प्रचण्डसँग कुरा गर्ने भन्दै तत्काल सरकार छाड्ने निर्णय नगर्न आग्रह गरेका थिए ।

उपेन्द्रले प्रचण्डसँग समेत असन्तुष्टि व्यक्त गरिसकेको स्रोतका दाबी छ ।

साथै उनले मंगलवार राति प्रमुख प्रतिपक्षी दल नेकपा एमालेका अध्यक्ष केपी शर्मा ओलीसँग पनि भेटेका छन् ।

बालकोटस्थित ओलीको निवासमा भएको भेटमा उपेन्द्रले सरकार छाड्ने मनस्थितिमा पुगेको भन्दै नयाँ सरकारको सम्भावनाबारे समेत कुराकानी गरेको स्रोतको दाबी छ ।

जवाफमा ओलीले नयाँ सरकारका लागि जसपा मात्र आउँदा नपुग्ने बताएका थिए ।

‘तपाईंले छाडेर मात्र सत्ता परिवर्तन हुँदैन होला, तैपनि तपाईंको कदममा मेरो समर्थन रहन्छ भन्ने ओलीको भनाइ थियो,’ उपेन्द्रनिकट स्रोतले लोकान्तरसँग भन्यो ।

प्रधानमन्त्री प्रचण्ड नेतृत्वको सरकारको हिस्सेदार जसपाका प्रतिनिधि सभामा १२ जना सांसद छन् । उपेन्द्र सत्ता गठबन्धनकै साथले उपनिर्वाचनबाट संसद् छिरेका हुन् ।

जसपाले समर्थन फिर्ता लिए प्रचण्डले संसद्मा फेरि विश्वासको मत लिनुपर्नेछ । सरकारमा उपेन्द्रका दुई मन्त्री छन् ।

जसपा सांसद प्रदीप यादवले आफूहरूको असन्तुष्टिका विषयमा सत्ता गठबन्धनसँग छलफल गर्ने निर्णय भएको बताए ।

'यस विषयमा सत्ता गठबन्धनसँग कुरा गर्ने भन्ने निर्णय भएको हो,' यादवले लोकान्तरसँग भने, 'तत्काल सरकार छाडिहाल्ने निष्कर्षमा भने पुगेका छैनौं ।'

२०६३ सालमा रौतहटको गौरमा माओवादीले आयोजना गरेको सभामा भएको आक्रमणमा २७ जना माओवादी कार्यकर्ताको मृत्यु भएको थियो ।

सो घटनाका पीडितले हत्याकाण्डमा उपेन्द्र यादवको संलग्नता रहेको बताउँदै आएका छन् ।

गौर हत्यकाण्डपीडित संघर्ष समितिका सदस्यहरूले प्रधानमन्त्री प्रचण्डसँग समेत भेटवार्ता गरेका थिए ।

सरकारले मंगलवार गौर हत्याकाण्डपीडित संघर्ष समितिसँग ५ बुँदे सहमति गर्दै उक्त घटनाको छानबिन गरी दोषीलाई कानूनबमोजिम कारवाही गर्ने जनाएको थियो ।

हेर्नुहोस्, सहमति पत्र :